इसीमाना संवाददाता
वीरगन्ज, २४ कार्तिक । वीरगन्ज महानगरपालिकाका नगर प्रमुख विजय कुमार सरावगीले महानगरक्षेत्रमा अब बन्ने सडकहरु साईक्लिङका लागि पनि उपयुक्त बनाउने बताउनुभएको छ ।
वीरगन्ज साईक्लिङक क्लबले आयोजना गरेको अन्तर क्लब साईक्लिलिङ प्रतियोगिताको समापन समारोहमा बोल्दै उहाँले साईक्लिङले महामारीको रुपमा फैलिएको कोभिड १९ को संक्रमणबाट सुरक्षित रहन आवश्यक प्रतिरोधात्मक क्षमता बढाउनमा र शरीरलाई स्वस्थ राख्ने उपयोगी उपाय भएको बताउनुभयो ।
पछिल्लो समयमा शारीरीक स्वास्थ्यका लागि साईक्लिङ गर्नेहरुको पनि रुची बढ्दै गएकोले सबै परिवारको स्वास्थ्यका लागि यो निकै महत्वपूर्ण रहेको बताउनुभयो । बनिसकेका सडकहरुमा साईक्लिङका लागि छुट्टै व्यावस्था नभएपनि अब बन्ने सडकहरु भने साईक्लिङका लागि पनि निर्माण गरिने बताउनुभयो । वीरगन्जको होटल मकालुदेखि बगहीसम्म १२ किलोमिटरको दूरीको प्रतियोगितामा ऋतिक अग्रवाल प्रथम, बद्री बहादुर अधिकारी दोश्रो र अनुप अग्रवाल तेश्रो भएका छन् ।
प्रतियोगितामा विजय हुनेहरुलाई प्रमुख अतिथि महानगर प्रमुख विजय कुमार सरावगीले कप, मेडल र प्रमाणपत्र प्रदान गर्नुभयो । प्रतियोगितामा सहभागितहरुलाई पनि मेडल र प्रमाणपत्र वितरण गरिएको थियो । प्रतियोगिताको निर्णायक भूमिकामा गोविन्द साह र दिप टिवडेवाल रहनुभएको थियो ।
वीरगन्ज साईक्लिङ क्लबका अध्यक्ष सञ्जय अग्रवालको अध्यक्षतामा भएको कार्यक्रममा महानगर प्रमुख सरावगी, नगर प्रमुखका प्रेस सल्लाहाकार गोविन्द देवकोटा लगायतको उपस्थिति रहेको थियो । मानवीय स्वास्थ्य र वातवरण प्रदूषण रोक्नलाई साईक्लिङ निकै उपयोगी सिद्ध भएको क्लबका अध्यक्ष सञ्जय अग्रवालले बताउनुभयो ।
तपाईको प्रतिक्रिया