बीरगंज २० असार । 
मरिच काण्डाका नाइके सुपारी किङका रुपमा चर्चित बीरगंजका उद्योगी अनिल पटवारी एकाएक भूमिगत भएका छन् । देखाउने दांतका रुपमा सिमेन्ट उद्योगी पनि रहेका पटवारीको मुख्य धन्दा भने सुपारी र कालो मरिचको तस्करी गर्नु रहेको खुलासा भएको छ ।

गत जेठ २१ गते बीरगंजको मुख्य नाकाबाट भारततर्फ लैजान लागिएको १२ मेट्रिक टन मरिच उनैको भएको रहस्य खुलेपछि उनी मोबाइल स्वीचअफ गरी फरार भएका हुन् । पर्सा प्रहरीले नेपालबाट भारततर्फ लान लागिएको उक्त परिमाणको कालो मरिच बीरगंजको कै भन्सार नाका इनरुवाबाट पक्राउ गरेको थियो । 

प्रहरीले मरिच तस्करी गरेको अभियोगमा ग्लोबल लेदर टेनिङ इन्डष्ट्रिज प्रा.लि.का सञ्चालक संजय अग्रवालसहित भन्सार एजेण्ट दिलीप श्रीवास्तव र ट्रक चालक भारतीय नागरिक धर्मेन्द्र कुमारलाई रङेहात पक्राउ गरी राजस्व अनुसन्धान विभागमा बुझाएको थियो । राजस्व अनुसन्धान विभागले थप अनुसन्धान गर्दा यो तस्करीका मुख्य अभियुक्त अनिल पटवारी  नै रहेको पुष्टि भएपछि उनी भूमिगत भएका हुन् ।

संघीय समाजवादी फोरमका मुख्य चन्दादाता पनि रहेका पटवारी यतिबेला काठमाडौंमै फोरमकै एक सासंदको संरक्षणमा बसेका छन । उनलाई राजस्व अनुसन्धान विभागले तीव्र खोजी गरिरहेको छ । भन्सार नाकामै उक्त मरिच पक्राउ परेपछि विभागले प्रहरीको सहयोगमा उनको घर तथा गोदाममा छापा मारी सबै कागजातहरु नियन्त्रणमा लिएको छ । 

श्री सिमेन्टस उद्योगले कलश ब्रान्डका ओपिसी र कलश गोल्ड पिपिसीको उत्पादन गर्दै आएको छ । हालसालै मात्र एनएस चिन्ह प्राप्त गरेको यो सिमेन्टस उद्योगद्धारा उत्पादित सिमेन्टस गुणस्तहीन र कमसल रहेको भन्दै विवादमा पर्दै आएको छ ।
यो सिमेन्टले चर्चित क्रिकेटर पारश खड्कालाई ब्रान्ड ऐम्बासाडर तोकेको छ ।

जेलमा रहेका संजय अग्रवाल पटवारीका आफ्नै काकाका छोरा हुन । सोझा–सिधा संजयको नाममा कम्पनी खडा गरेर विगत लामो समयदेखि सुपारी र मरिचको तस्करी गर्दै आएका पटवारीले १२ बर्षकै अवधिमै १० अरब भन्दा बढी सम्पत्ती आर्जन गर्न सफल भएको चर्चाले यतिबेला बीरगंज तातेको छ । आफनै भाई थुनामा रहेपनि भाइलाई छुटाउन पटवारीले कुनै भूमिका खेलेनन । संजयका साथीहरुको सहयोगमा उनी बुधवार ३ करोठ ७६ लाख  धरौटी रकम बुझाएर थुनामुक्त भएका छन । 

करिव २ बर्ष अगाडि उनले छाला पठाउने नाममा भारतको कानपुर शहरमा अवैधरुपमा २ ट्रक सुपारी पठाउँदा सो अवैध सुपारी भारतीय प्रहरीले पक्राउ गरी जफत गरेको थियो । भारतीय सरकारले ठूलो रकम जरिवाना गरेको उक्त मुद्धा हाल पनि चलिरहेको समाचार स्रोतले बताएको छ ।

देखावटी रुपमा सिमेन्टस उद्योगी र व्यापारी रहेतापनि उनको वास्तविक धन्दा भने सुपारी र मरिचको अवैध तस्करी गर्नु रहेको बीरगंजका व्यवसायीहरु बताउछन् ।

वीरगंज भन्सारबाटै सेटिङ मिलाएर तस्करी धन्दा चलाउने भन्सार अधिकृत उद्धव ढुङ्गानामाथि यतिबेला मन्त्रालयको निर्देशनमा छानविन भैरहेको छ । मरिच पास गराउने भन्सार अधिकृत उनै ढुङगाना हुन् । तर ढुङगाना अनुसन्धानको दायरमा पनि नआएको र उनले उन्मुक्ति पाएको भन्दै बीरगंज उद्योग वाणिज्य संघका अध्यक्ष तथा प्रदेश सभा सदस्य ओमप्रकाश शर्माले सार्वजनिक मन्चहरुमै प्रश्न उठाउदै आएका छन ।