सिमरा,१९ फाल्गुन  । नेपाल फोटो पत्रकार महासंघ प्रदेश २ को अध्यक्षमा पंकज श्रेष्ठ सर्वसम्मत चयन हुनु भएको छ।महासंघको सोमवार बाराको सिमरामा सम्पन्न प्रथम अधिवेशनले श्रेष्ठको अध्यक्षतामा ११ सदस्यीय प्रदेश कमिटी चयन गरेको हो । 

कमिटीको उपाध्यक्षमा प्रभातकुमार झा, महासचिव दिवाकर भण्डारी, सचीव फणीदेव महत, सहसचिव परिश कर्ण, कोषाध्यक्ष गणेश साह रहनु भएको छ । यसैगरी समितिको सदस्यमा बिजय चौहान, श्याम गुप्ता, अच्युतम सापकोटा र नविन कुमार नवल चयन हुनु भएको छ ।
त्यसैगरि अधिवेशनले दीपेन्द्र चौहान, के.सी.लामिछाने,टंक क्षेत्री राजु बिश्वकर्मा  राम सर्राफ लगायत रहनु भएको सल्लाहकार समिति निर्माण पनि निर्माण गरेको छ ।

यसअघि अधिवेशनको उदघाटन नेपाल पत्रकार महासंघ प्रदेश २ का अध्यक्ष दीपेन्द्र चौहानले गर्नु भएको थियो । अधिवेशनको उदघाटन गर्दै अध्यक्ष चौहानले सामाजिक न्याय र समृद्धिका निम्ति फोटो पत्रकारको भुमिका अहम हुने बताउनु भयो । पत्रकारितालाई विश्वसनीय बनाउन फोटोपत्रकारिताको महत्त्व बढ्दै गएको भन्दै अध्यक्ष चौहानले यसको समग्र विकासका निम्ति महासंघले सहयोग गर्ने प्रतिबद्धता ब्यक्त गर्नु भयो । 

कार्यक्रममा नेपाल पत्रकार महासंघ प्रदेश २ का उपाध्यक्ष के.सी. लामिछानेले फोटोपत्रकारितामा बढदो आकर्षणले समग्र पत्रकारिताको विकास हुनेमा आफू आशावादी रहेको बताउनु भयो । फोटोपत्रकारिता विशुद्ध प्राविधिक बिषय रहेको र तस्वीरको माध्यमबाट समाजलाई सूसुचित गर्ने क्षेत्र रहेको हुँदा फोटोपत्रकारको दक्षता र क्षमता अभिवृद्धिका लागि प्रशिक्षणमुलक कार्यक्रम निरन्तर आयोजना गरिनुपर्ने बताउनु भयो । 

नेपाल फोटोपत्रकार महासंघका केन्द्रीय महासचिव हरि रेग्मीले पत्रपत्रिका र टेलिभिजनमा फोटो, भिडियोको काम गर्ने पत्रकारहरुलाई संगठित बनाएर अघि बढाउन महासंघले भुमिका खेलिरहेको बताउनु भयो । महासंघले काठमाडौं मात्र नभई देशका सबै जिल्लामा सक्रियरुपमा काम गर्ने पत्रकारहरुलाई संगठित गर्ने, फोटो र भिडियोको माध्यमबाट सम्बन्धित जिल्लाको पर्यटन प्रवर्द्धनमा टेवा पुर्याउने, क्षमता अभिवृद्धि गर्ने लगायत गतिविधिलाई अघि बढाइरहेको बताउनु भाये। 

कार्यक्रममा महासंघका केन्द्रीय सदस्य जीतलाल श्रेष्ठले फोटोपत्रकारिताको विकासका लागि निजगढमा तालिम केन्द्रको अवधारणासहित भौतिक पूर्वाधार निर्माणको तयारी गरिरहेको बताउनु भयो । महासंघको बारा शाखाको नेतृत्वमा निर्माण हुने तालिम केन्द्रबाट दक्ष फोटोपत्रकार उत्पादन गर्न सकिने श्रेष्ठको भनाइ थियो । कार्यक्रममा नेपाल पत्रकार महासंघ प्रदेश २ का सचीव गुरुप्रसाद गौतमले प्रदेशको समग्र विकासका निम्ति फोटोपत्रकारिताको भुमिका अहम रहेको बताउनु भयो । 

महासंघ प्रदेश २ तदर्थ समितीका अध्यक्ष राम सरराफको अध्यक्षतामा सम्पन्न अधिवेशनमा केन्द्रीय उपाध्यक्ष सागर श्रेष्ठलगायतको उपस्थिति रहेको थियो । कार्यक्रमको सहजीकरण सचीव फणीदेव महतले गरेका थिए ।