बीरगंज २३ बैशाख ।

बीरगंजको नारायणी अस्पतालमा आज देखी पोलिमरेज चेन्ज रियाक्सन ( पिसीआर) मेशिन संचालनमा आएको छ । अव यस क्षेत्रका नागरिकको थ्रोट स्वाबको परिक्षण नारायणीमा रहेको पिसीआर मेशिनबाट हुनेछ ।

०७६ चैत ३० गते बीरगंजमा तीन जना भारतीय नागरिकमा कोरोना भाइरसको संक्रमण पुष्टि भएपछि कोभिड अस्पताल र पिसीआर मेशिनको जोडदार माँग भएको थियो । पर्सा जिल्लामा अस्पताल र पिसीआर मेशिन जडानमा निकै ठुलो राजनीति नै भयो । 

बीरगंजमा कोभिड अस्पताल बनाउन स्थानीय सरकार र स्थानीय प्रशासनले छलफल गरेकै थिए । तर त्यसमाथि राजनीति भयो र त्यसले सफलता पाउन सकेन । संघ सरकारले त्यतीबेलाको आवश्यकतालाई महशुस गरेर चैत ३१ मा नारायणी अस्पताललाई कोभिड अस्पतालको रुपमा निर्णय गर्यो ।

त्यसपछि जागेका राजनीतिक दलहरु कोभिड अस्पतालको नाममा जागेर सडक सम्म पुगे ।  बीरगंज महानगरपालिका र गण्डक अस्पतालवीच अस्थायी कोभिड अस्पताल संचालन गर्ने सम्झौता भएपछि अर्कोथरीले राजनीति शुरु गरे । त्यही राजनीतिको चपेटामा परेको कोभिड अस्पतालको नाममा भएको राजनीतिले अन्तत आज पूर्ण बिराम पाएको छ । 

त्यस्तै भयो पिसीआर मेशिन । द्रुत परिक्षण गर्नकालागि पिसआर मेशिन प्रदेश सरकारले बिभिन्न समस्या झेलेर भएपनि ल्यायो तर त्यसलाई संचालन गर्ने आवश्यक एसेसरिज भने ल्याएन । मंत्रीपरिषदबाट ५० लाख रुपैया दिने निर्णय समेत गर्यो तर एक पैसा पनि निकासा दिएन । प्रदेश सरकारले पैसा दिने निर्णय त गर्यो तर त्यसको निकासको प्रवन्ध भने मिलाएको छैन ।

पिसीआर मेशिन राजनीतिको अर्को फण्डा बन्यो । तर नारायणी अस्पतालका मेडिकल सुपरिटेण्डेण्ट डा. मदन कुमार उपाध्याय ले पिसीआर मेशिन संचालनमा ल्याउने अठोट गर्नु भयो आज त्यो भयो  ।

त्यसकोलागि चिकित्सकहरुको सहयोग महत्वपूर्ण रहेको छ । पीसीआर मेशिन जडान हुन ७५ लाख रुपैयाको खर्च अनुमान गरिएको डा उपाध्यायले बताउनु भयो । तर कतैबाट पैसा आएको छैन  उहाँले भन्नु भयो “अस्पतालको नाममा उधोरोमा समान ल्याएर संचालन योग्य बनाएका छौ ” । 

अन्य प्रदेशमा पिसीआर मेशिन संचालनकालागि बेश थियो । भेटनरीका प्रयोगशालाहरु भएकोले त्याहा पिसीआर मेशिन छिटो संचालनमा आयो डा.उपाध्यायले भन्नु भयो “प्रदेश २ मा त्यो खालको बेश नभएकोले जिरोबाट काम गर्नु पर्दा मेशिन संचालनमा ल्याउन समय लागेको हो । 

पिसीआर मेशिनको संचालनले परिक्षण द्रुत हुने ,समयको बचत हुने धेरैको परिक्षण गर्न सकिने भएकोले यसको फाइदा मध्य तराईका नागरिकलाई हुने भएको छ । बीरगंजमा जडान भएको पिसीआर मेशिनले एकै दिनमा ९० जनाको थ्रोट स्वाब परिक्षण गर्न सक्ने बताइएको छ ।

अस्पतालमा जडान भएको पीसीआर ल्याबबाट आज पहिलो चरणमा १६ जनाको स्वाबको परीक्षण गरिएको अस्पतालका मेडिकल सुपरिटेन्डेन्ट डा।मदन उपाध्यायले जानकारी गराए । 

नारायणी अस्पतालमा पहिलो पटक गरिएको पीसीआर परीक्षण रिपोर्टसहित १६ जनाको स्वाब पुनः राष्ट्रिय जनस्वास्थ्य प्रयोगशाला टेकु पठाइएको छ। टेकुको रिपोर्टसँग वीरगञ्जको रिपोर्ट मिले मात्रै ल्याबको परीक्षण सार्वजनिक गरिने डा.उपाध्यायले बताउनु भयो ।