वीरगंज । वीरगञ्ज महानगरपालिका वडा नम्बर १७ अलौमा यही चैत ८ गतेदेखि हुने महायज्ञमा दलित समुदायलाई पूजामा बस्न नदिने महायज्ञ पूजा मुल समितिको निर्णयका बिरुद्ध दलीत समुदायले संघर्ष समिति बनाएका छन ।

०७९ चैत ३ गते वीरगंजमा रहेको नेपाल पत्रकार महासंघ पर्साको सभाकक्षमा पत्रकार सम्मेलनको अयोजना गरेर संघर्ष समिति निर्माण गरिएको जानकारी दिइएको हो ।

बिष्णु रामको अध्यक्षतामा १३ सदस्यीय संघर्ष समिति गठन गरिएको हो । समितिले दलित समुदायको मागलाई सम्बन्धित निकायलाई जानकारी गराउने र मागको सम्बोधनका लागि पहल गर्ने निर्णय गरेको छ ।

पूजामा दलीत समुदायलाई सहभागी नगराइए आन्दोलन गरी दबाब सृजना गर्ने संघर्ष समितिका अध्यक्ष बिष्णु रामले बताए । संविधानले दिएको अधिकार समाजमा स्थापित गर्न संघर्ष समितिले पहल गर्ने उनको भनाई छ ।

अहिलेको आन्दोलनले भोली दलितका सन्ततीले विभेद खेप्न नपर्ने वतावरण बन्ने उनको विश्वास छ ।

वीरगञ्ज महानगरपालिका वडा नम्बर १७ अलौमा यही चैत ८ गतेदेखि हुने महायज्ञमा दलित समुदायलाई पूजामा बस्न नदिने महायज्ञ पूजा मुल समिति विरुद्ध आन्दोलनरत दलित समुदायको माग सम्बोधन नभएपछि दलीत समुदायले संघर्ष समिति बनाएको हो ।

०७९ फागुन २९ गते वीरगञ्जको घण्टाघरमा प्रदर्शन गर्दै जिल्ला प्रशासन कार्यालय पर्साका सहायक प्रमुख जिल्ला अधिकारी भिमकान्त पौडेललाई उजुरी दिएपनि विवाद सुल्झिन सकेको छैन ।

यद्धपी यो वीचमा जिल्ला प्रशासन कार्यालयमा उजुरी दिएपछि जिल्ला प्रहरी कार्यालय पर्सामा प्रहरी नायब उपरीक्षक दिपक गिरीको उपस्थितिमा २ चरणमा छलफल चल्यो तर निष्कर्ष निस्केन ।

तेस्रो चरणमा पूनः जिल्ला प्रशासन कार्यालय पर्सामा प्रमुख जिल्ला अधिकारी हिरालाल रेग्मी, वीरगञ्ज महानगरपालिकाका प्रमुख राजेशमान सिंह लगायतको रोहबरमा भएको छलफल पनि निस्कर्षविहिन भयो । यो छलफलमा राज्यका निकाय गम्भिरतापूर्वक प्रस्तुत नभएको दलीत अगुवाको बुझाई छ ।

नेपाल दलित मुक्ति मोर्चा मधेश प्रदेशका अध्यक्ष लवकुश बैठाले छुवाछुत गर्नेलाई पनि कारवाही गर्नु पर्ने बिचार ब्यक्त गर्दछन ।

महायज्ञ पूजा मुल समितिका सदस्य एवम् स्थानीय संसारी माई मन्दिर व्यवस्थापन समितिका अध्यक्ष प्रह्लाद चौधरीले खुलेयाम रुपमा बरु जेल जान तयार तर यज्ञमा दलितलाई बस्न नदिने बताउँदा पनि प्रहरी प्रशासन कानमा तेल हालेर बसेको बैठाको आरोप छ ।

कानुन कार्यन्वयनमै विभेद भएपछि अब न्याय पाउने आशमा आन्दोलन गर्न बाध्य भएको दलित अगुवा जवाहिर रामले बताए ।
स्थानीय दलित विकास पथका अध्यक्ष शिवनारायण रामले वीरगञ्ज अलौका दलितको समस्या मात्रै नभएर सिंगो दलित समुदायमाथिको विभेद भएको बताए । अहिले पनि चुप लागेर बसेमा फेरी आगामी दिनमा पनि सहनुपर्ने भन्दै उनले अब आवाज उठाउनुको विकल्प नरहेको बताए ।

पत्रकार सम्मेलनमा दलीत महिलाहरुको पनि उल्लेख्य सभागिता रहेको थियो । अलौ निवासी ७० वर्षीय सिधारिया देवी आक्रोशित मुद्रामा थिइन बिभेद बिरुद्ध बिद्रोह गर्नु पर्ने उनले बताइन ।

घरको कामकाज छोडेर वीरगंज आएकी ६० वर्षीय जियन देवीले यसअघि छठ पर्व, दुर्गा पूजा लगायतका धार्मिक क्रियाकलापमा सरिक हुँदा केही फरक नपर्ने तर अहिले यज्ञमा बस्दैमा के फरक पर्छ भन्दै प्रतिप्रश्न गरिन ।