वीरगन्ज, १९ मंसिर । बाराको बरियारपुरमा लाग्ने पञ्चबर्षीय गढीमाई मेलामा बलि दिईएका बोका राँगाको सिनो व्यावस्थापनमा लापरवाही गरेपछि बारा प्रहरीले पक्राउ गरेका गढीमाईमेलाको बलि व्यावस्थापन उपसमितिका उपाध्यक्ष विरेन्द्र साह रिहा भएका छन् । गढीमाईमा बली दिईएको राँगाको टाउको र सिनो समयमा व्यवस्थान नगरी लापरवाही गरेको भन्दै बारा प्रहरीले बली व्यवस्थापन उपसमितिका पदाधीकारी विरेन्द्र साहलाई हिजो पक्राउ गरेको थियो ।

अस्ती बिहान बली दिईएको राँगाको टाउको र आन्द्रा भुँडी व्यवस्थापन नगरी मेला स्थलबाट सम्पर्कबिहीन भएपछि समितिका पदाधिकारीलाई घरबाटै नियन्त्रणमा लिन बाराका प्रमुख जिल्ला अधिकारी फणीन्द्रमणी पोखरेलले प्रहरीलाई निर्देशन दिनु भएको थियो । मोबाईलको फोन स्वीच अफ गरेर अस्ती मंगलबार साँझदेखि नै गढीमाई मेला व्यवस्थापन मुल समितिका पदाधिकारी मेला स्थलको कार्यालय समेत बन्द गरी सम्पर्कबिहीन भएका थिए ।

प्रमुख जिल्ला अधिकारी पोखरेलको नेतृत्वमा समितिको कार्यालयमा पुगेका सुरक्षाकर्मी पनि लामो समय सम्म कार्यालय बाहिर बसेका थिए । समितिको कार्यालय नै बन्द गरेर पदाधिकारी सम्पर्क्बिहीन बनेपछि उनीहरुको घर–घरमै प्रहरी खटाउनु परेको बाराका प्रमुख जिल्ला अधिकारी फणिन्द्रमणी पोखरेलले बताउनुभयो ।  बली व्यवस्थापन उपसमितिका उपाध्यक्ष विरेन्द्र साहलाई हिजो अपरान्ह मेला स्थलबाटै प्रहरीले नियन्त्रणमा लिईएको थियो ।

मेला व्यवस्थापनमा भएका कमी कमजोरीलाई सुधार्नुको सट्टा बली दिईएको २४ घण्टामा वितिसकेपनि हिजो अपराह्न सम्म सिनो व्यवस्थापन नगरेपछि दुर्गन्धित भएर मेलामा रोगको संक्रमण फैलिने चिन्ता भएपछि यसप्रति समिति स्वयम जिम्मेवार बनाउनलाई पनि प्रहरीले पक्राउ गरेको बाराका प्रहरी उपरीक्षक विकासराज खनालले बताउनुभयो । उहाँले हिजो नियन्त्रणमा लिएको बलि तथा सिनो व्यावस्थापन उपसमितिका उपाध्यक्ष साहलाई हिजै व्यावस्थापन चुस्त दुरुस्त राख्ने प्रतिबद्धता सहित छाडिएको बताउनुभयो ।

काम गर्ने जिम्मेवारी लिएर समितिमा बस्ने र कामै नगर्ने समिति कारबाहीको भागिदार रहेको प्रमुख जिल्ला अधिकारी पोखरेलको भनाई थियो । समितिका पदाधीकारी सम्पर्क्बिहीन भएपछि रंगशालामा बली व्यवस्थापन गर्न नगर प्रहरी, नगरपालिकाका कुचीकार र नगरपालिको डोजर समेत खटाएको उहाँले जानकारी दिनुभयो । सिनो व्यवस्थापन नगर्ने र गैरजिम्मेवार समितिका पदाधिकारीलाई कारबाही गर्न प्रमुख जिल्ल अधिकारी समक्ष आग्रह गर्नुभयो ।

सिनो व्यवस्थापन गर्न पशु क्वारेन्टाईन डिभिजन कार्यालय वीरञ्जका प्रमुख डा. हरेराम यादवको नेतृत्वमा चिकित्सक टोली मेला स्थलमा खटिएका छन् । बलि दिईएको दिनदेखि नै खटिएको चिकित्सक टोली बली व्यवस्थापन र मुल समितिकै पदाधिकारीलाई मेला स्थलमा नभेटेपछि सहयोगको लागि प्रजिअलाई गुहारेका थिए । त्यसपछि मेला स्थलमा पुग्नुभएका प्रमुख जिल्ला अधिकारी पोखरेलले सिनो व्यवस्थापन नगर्ने समिति माथि कारवाही स्वरुप नियन्त्रणमा लिन निर्देशन दिनुभएको थियो । त्यसपछि भने मेलाको सिनो व्यावस्थापनमा सरोकारवालाहरुले सक्रियता देखाएका छन् ।

अहिले पनि बली दिईएको स्थान गढीमाई मन्दिरको पूर्वतर्फको रंगशालामा पशु क्वारेण्टाईन कार्यालय वीरगन्जका प्रमुख डाक्टर हरेन्द्र यादवको नेतृत्वमा पशुप्राविधिकहरु सहितको टोली व्यावस्थापनमा खटिएका छन् । बली दिईएको सिनो व्यावस्थापनका लागि चुना छर्किने, डोजरले खाल्डो खनेर पुर्ने काम भईरहेको पशु क्वारेण्टाईन डिभिजन  प्रमुख डाक्टर यादवले जानकारी दिनु्भयो ।