प्रथम मधेस आन्दोलनको आज १६ वर्ष पूरा भएको छ । स्वायत्त मधेस एक प्रदेश र अधिकार प्राप्तिका लागि आज भन्दा ठीक १६ वर्ष अगाडि मधेसी जनताले आन्दोलनको विगुल फुकेका थिए । प्रथम मधेश आन्दोलन आन्दोलन १९ दिनसम्म चलेको थियो ।

आजकै दिन ५ माघ २०६३ मा प्रथम मधेश आन्दोलनको क्रममा सिराहाको लहानमा रमेश महतो शहीद भएका थिए ।

मधेसमा अधिकारका लागि पटक पटक गरी तीन पटक आन्दोलन भयो । तीनवटै मधेस आन्दोलनमा गरी जम्मा १०३ जनाले शहादत प्राप्त गरे । मधेस आन्दोलनकै बलमा प्रदेशको नामाकरण मधेश प्रदेश भएको छ ।

, मधेस आन्दोलनको सम्झनालाई ताजा राख्नका लागि प्रत्येक वर्ष यो दिनलाई बलिदानी दिवसको रुपमा मनाइदै आएको छ ।

सोही अवसर पारेर मधेस केन्द्रित दल र प्रदेश सरकारले माघ ५ गतेलाई बलिदानी दिवसको रुपमा मनाउने घोषणा गरेको छ ।

मधेस आन्दोलनका शहिदहरुको सम्झनामा मनाइदै आएको शहीद दिवस माघ ५ गते वीरगन्जमा पनि बलिदानी दिवस मनाइएको छ।
बलिदानी दिवसमा मधेस प्रदेश सरकारले आज बिहीबार प्रदेशमा सार्वजनिक बिदा दिएको छ।

वीरगन्जको घण्टाघर चोक नजिकैको मधेसी सहिद पार्कमा बिहीबार जनता समाजवादी पार्टी पर्साका नेता कार्यकर्ताले शहिदका शालिकमा फूलमाला चढाएर श्रद्धाञ्जली अर्पण गरे।

त्यस क्रममा उनीहरुले मधेस आन्दोलन र मधेसी शहिदहरुकै त्याग र बलिदानीका कारण मधेसीले पहिचान , संघीयता , समावेशिता लगायतका अधिकार पाउन सफल भएको बताए। अझै पनि मधेस आन्दोलनका केही मुद्दा सम्बोधन हुन बाँकी नै रहेको भन्दै जसपाका नेताहरूले त्यसका लागि आफूहरुको संघर्ष जारी नै रहेको जिकिर गरे।

जसपा पर्साका अध्यक्ष रामनरेशप्रसाद यादवको अध्यक्षता तथा प्रदेशसभा सदस्य प्रमोद जयसवालको प्रमुख आतिथ्यतामा भएको कार्यक्रममा जसपाका केन्द्रीय सदस्य फिरोज मन्सुर, केन्द्रीय परिषद सदस्य शिवजी सोनी,जसपा मधेस प्रदेश उपाध्यक्ष बृजमोहन तिवारी, जिल्ला सचिव तबरेज अहमद, युवा नेता सरोज यादव, अमित यादव, सफ्रोज आलम, विद्यार्थी नेताहरु एजाजबाबु रान्की, सागिर आलम, नैमोदिन आलम, फरिद आलम, आबिद समानी लगमयतको सहभागिता थियो।

मधेस आन्दोलनका शहिदहरुकाे सम्झनामा मनाइने बलिदानी दिवस बिहीबार पर्साको पोखरियामा पनि मनाइएको छ ।पोखरीया बजार स्थित शहिद चन्दन पटेलको शालीकमा फुलमाला अर्पण गरि बलिदानी दिवस मनाइएको हो ।

जनता समाजवादी पार्टी (जसपा)) को पोखरिया नगर समितिले श्रद्धाञ्जली सभाको आयोजना गरि बलिदानी दिवस मनाएको जसपा पाेखरिया नगर समितिका अध्यक्ष राजु साहले जानकारी दिए । 

श्रद्धान्जलीसभामा बोल्दै वक्ताहरुले मधेस आन्दोलन र मधेसी शहिदको बलिदानीबाट नै संघीयता, समावेशीता जस्ता राजनीतिक उपलब्धिहरु प्राप्त भएकाले शहिदको त्याग र आहूतीलाई भुल्न नहुनेमा जोड दिए ।

कार्यक्रममा जसपाकी केन्द्रिय सदस्य नेतृ सल्मा खातनु, जसपाका केन्द्रीय सल्लाहकार खलील मिया, शहिद चन्दन पटेलका काका मनोज पटेल, जसपाका क्षेत्रीय अध्यक्ष पवन कुमार सिंह, नेतृ डा.मधु गुप्ता, मुख्तार मियाँ, हरिन्द्र साह, देवेन्द्र साह, जग मुखिया लगायतका नेता कार्यकर्ताको पनि सहभागीता थियो ।