काठमाडौं । आर्थिक अनियमिततामा जोडिएकी डा. संगीता कौशल मिश्र स्वास्थ्य तथा जनसंख्या मन्त्री हुनबाट रोकिएकी छन।

आइतबार मन्त्री नियुक्तिका लागि मिश्र सहित पाँच जनाको नाम सिफारिस भएको थियो। तत्कालीन स्वास्थ्यमन्त्री मोहन बस्नेतको पालामा विभागले अनियमित रूपमा गरेको खरिद निर्णयमा प्रत्यक्ष जोडिएकी मिश्रलाई स्वास्थ्यमन्त्री बनाउन  सरकारले आइतबार उनलाई सिफारिस गरेको थियो।

स्रोतका अनुसार स्वास्थ्य मन्त्रालयको अतिरिक्त सचिवका रुपमा रहेकी डा. मिश्रले मन्त्री बन्ने पक्का भएपछि आइतबार नै राजीनामा दिएकी थिइन। उनको राजीनामा समेत स्वीकृत भइसकेको स्रोतको दाबी छ। 

उनीसहित पाँच जनालाई मन्त्रीमा नियुक्त गर्न आइतबार साँझ नै राष्ट्रपति कार्यालयमा नाम पठाइएको थियो। तर डा. संगीता मिश्राको नाम परेको थाहा पाएपछि अख्तियार दुरुपयोग अनुसन्धान आयोग सक्रिय बन्यो।

 डा. मिश्राविरुद्ध भ्रष्टाचार मुद्दाको अनुसन्धान टुंगिएर विशेष अदालतमा मुद्दा दायर गर्ने तयारी भइरहेको सूचना अख्तियारले राति ९ बजेपछि दिएको थियो।

अख्तियारको सूचना पछि सबै मन्त्रीको नियुक्ति होल्डमा राखिएको थियो ।  स्वास्थ्य मन्त्रालयकी अतिरिक्त सचिव रहेकी मिश्र स्वास्थ्य सेवा विभागको प्रमुख रहँदा निश्चित स्वास्थ्य उपकरण आपूर्तिकर्ताको स्वार्थमा काम गरेको आरोपमा मुछिएकी थिइन।

 अख्तियारले मिश्र स्वास्थ्य सेवा विभागको महानिर्देशक हुँदा स्वास्थ्य उपकरण खरिदमा अनियमितता गरेका कम्तीमा तीनवटा उजुरीमा अनुसन्धान गरिरहेको छ। तिनैमध्येको करिब १५ करोड रुपैयाँ भ्रष्टाचारको एउटा मुद्दा प्रक्रियामा जान लागेको हो।

स्वास्थ्य सेवा विभागअन्तर्गतको व्यवस्थापन महाशाखाको निर्देशकमा डा. श्रवणकुमार थापा थिए भने खरिद शाखा प्रमुखमा डा. सुरेन्द्र चौरासिया थिए।

बायोमेडिकल इन्जिनियरका रूपमा आशिष चौहान थिए। यही समूहले मिलेर विभागको खरिद स्पेसिफिकेसन ‘लक्ड’ गरेर निश्चित व्यापारीको स्वार्थमा काम गरेको थियो।

पछि मिश्र, थापा र चौरासियाको सरुवा भयो, तर चौहान विभागमै रहे। उनी प्रदीप पौडेलको पालामा भएको मिलेमतोको खरिदमा पनि सहयोगी थिए। खरिद अनियमिततामा चौरासिया र आशिष समेत बदनाम पात्र मानिन्छन।

फागुन २२ गतेको मन्त्रिपरिषद् बैठकले डा. विकास देवकोटालाई सचिव नियुक्त गरेपछि उनी असन्तुष्ट थिइन। त्यसयता उनी लगातार बिदामा थिइन।

बिदामै रहेकी उनी हालैमात्र मन्त्रालयमा हाजिर भएकी थिइन। मन्त्रिपरिषद्को निर्णयविरुद्ध सर्वोच्चमा रिट दिएकी उनले तत्कालीन स्वास्थ्यमन्त्री प्रदीप पौडेलको त सार्वजनिक रूपमै राजीनामा मागेकी थिइन। मन्त्री बनाइने जानकारी गराइएपछि आइतबारै उनले स्वास्थ्य मन्त्रालयको अतिरिक्त सचिव पदबाट राजीनामा गरेकी थिइन।तर आज न उनी मन्त्री भइन न त जागीर नै रह्यो ।