बीरगंज १८ माघ । 
राष्ट्रीय गौरवको योजनाको रुपमा रहेको हुलाकी राजमार्ग निर्माणको काम निकै ढिलासुस्तीमा हुदैछ ।

पर्सा जिल्लाको बीरगंज ठोरी सडक खण्डको ६० किलोमिटर सडक निर्माणकालागि दुईवटा निर्माण कम्पनीले ठेक्का लिएका छन ।

बीरगंजको प्रतिमाचोक देखी ३० किलोमिटर सम्मको ठेक्का पप्पु अमर कनटेक जेभीको जिम्मामा छ भने वाँकी ३० किलोमिटरको सडक निर्माणको जिम्मा बनीया र कालिका कन्सटकसनको रहेको छ । २ अर्व ११ करोड ८९ लाखमा ०७४ मंसीर १ गते ठेक्का सम्झौता भएको हो ।

हाल सममको कामको भौतीक प्रगती भने १३ प्रतिशत मात्र रहेको छ भने आर्थिक निकासा १७ प्रतिशत रहेको हुलाकी सडक परियोजनाको कार्यालय बीरगंज प्रमुख अनुठालाल पटेल बताए । उनले हुलाकी सडक र पुलहरुको निर्माण कार्य सन्तोषजनक रहेको बताए ।

प्रतिनिधि सभाको बिकास तथा प्राविधिक समितिले शुक्रवारबाट हुलाकी राजमार्ग निर्माणको स्थलगत अनुगमन शुरु गरेको छ । त्यसको पहिलो शुरुवात बीरगंजमा आयोजना गरिएको अन्तरक्रियामा पटेलले यस्तो जानकारी दिएका हुन । उनले सन्तोष ब्यक्त गरे पनि परियोजना निकै सुस्त रहेको छ । 

बीरगंज देखी ठोरी सम्म ६० किलोमिटर सडक निर्माँणकालागि बिभिन्न समस्याहरु पनि रहेका छन । बीरगंजको प्रतिमा चोक देखी तिलावे पुलसम्म सरकारको मुआव्जा नदिने नीति छ । तर स्थानीयहरुले मुआब्जा नदिइ काम गर्न नदिने अडान लिए पनि सडकको मध्यबिन्दुबाट दाया बाया १२ मिटर कायम गरि काम शुरु भएको छ । त्यस्तै बहुवरवा भाठामा मुआव्जा निर्धारणमा बिवाद छ र स्थानीयले काम गर्न नदिने अडान लिएका छन । सुवर्णपुर खण्डमा पहिला लालपूर्जा थिएन ।

पछि सरकारले लालपूर्जा बितरण गरेपछि स्थानीयले मुआव्जा दावी गरेका छन । यो समस्या पनि जस्ताको तस्तै छ । बीरगंजमा रहेको हुलाकी सडक कार्यालयले मुआव्जका समस्याहरुलाई मात्र हेर्छ । तर त्यसले मुआब्जा सम्बन्धी समस्या पनि हल गर्न सकेको छैन ।

ओढारमा पुलको निर्माण नै सडक भन्दा पर गरिएको त्यसले  किसानको धेरै जमीनलाई नोक्सानी पारेको ठोरी गाउँपालिका वडा नं ३ ओढारका गंगा बहादुर खडका ले बताए उनले जनताको जमीनको मुआव्जा दिन र गलत डिजाईन गर्ने र निर्माण गर्ने ठेकेदारलाई कारवाही गर्न समेत समिति समक्ष माग गरे ।

तराई मधेशको समृद्धिको आधार । तराइको लाइफलाईनको  रुपमा रहेको हुलाकी राजमार्ग मुलुकले गौरव गर्न लायक ठानिएको राष्ट्रीय गौरवका योजना” अन्र्तगत पर्दछ ।

राष्ट्रीय गौरवको योजनाको हुलाकी राजमार्ग निर्माण भइरहेको ठाउमा भने त्यसको गुणात्मकता ,निर्माणको गती,अन्य समस्याको समाधानकालागि पहल गर्ने गरि सरकारले संयान्त्र नै खडा गरेको छैन । नेतृत्वबिहिन अवस्थामा रहेको हुलाकी सडक परियोजनाको यो अवस्थाको कारण नै सरकारी अर्घेल्याई हो । 

पर्साका प्रमुख जिल्ला अधिकारी नारायण भट्टराईले परियोजना हेर्ने जिम्मेवार कार्यालय यही भएको भए काम गर्न सजिलो हुने सुझाव दिए । सरकारले ठेक्का लगाएका भौतीक निर्माणका परियोजनाहरु बिरलै मात्र समयसीमा भित्र सकिएका छन । त्यसमाथि पप्पुले काम हात पारेको छ भने समसमा काम नसक्ने मानक बनाउनेमा उसको नाम समावेश छ ।

तर सरकारले राज्यकोषबाट सेवा सुविधा दिएर राखेका अड्डा र कर्मचारीहरुले ति परियोजनाहरु बेलैमा सक्नकालागि कुनै योगदान नदिएको देख्दा ति कर्मचारीहरुले राज्यको सेवा गरेका छन की ठेकेदारको तावेदारी भन्ने प्रश्न उठन थालेको छ ।

तर समितिका सभापति कल्याणी खडकाले अनुगमन पछि के देखिन्छ त्यसका आधारमा काम गर्ने बताउनु भयो ।कार्यक्रममा समितिका सदस्यहरु प्रभू साह,सरला यादव मिनाक्षी झा रमेश पटेल लगायतका संघीय संसदका सदस्य तथा प्रदेश सभाका सदस्यहरुको सहभागिता रहेको थियो ।

कार्यक्रममा नेकपाका नेता नागेन्द्र चौधरी ,पत्रकारहरु के.सी.लामिछाने,श्याम बन्जारा र उपेन्द्र ठाकुर लगायतले जिज्ञासा राखेका थिए ।