उन्चालीस दिनपछि बीरगंज ठोरी खण्डमा चल्न थाले सावारीहरु

3/8/2018 गते 00 00 मा प्रकाशित 727 पटक पढिएको

बीरगंज २५ फागुन।

गत माघ १६ गतेदेखि बिरगंज ठोरी सडक खण्डमा चल्न नपाएका यात्रुबाहक सवारी शुक्रवार ३९ औ दिनदेखि पुनः चल्न थालेका छन् ।आज बिहानदेखि नै आठघरे,ब्रम्हानगर र ठोरी लगायतका ठाउँहरुबाट बीरगंजका लागि यात्रुबाहक बस र टाटासुमो छुटेका हुन् ।

गत माघ १६ गतेदेखि ठोरी गाउँसभाको पहिलो बैठकको निर्णय खारेजीको माग राखेर आन्दोलनरत सुवर्णपुरबासीले बन्द आव्हान गरेकोले यातायात संचालन हुन सकेको थिएन ।

गत माघ १८ गतेदेखि नै गाउँपालिकाको मध्य भागमा सेवा केन्द्र हुनुपर्ने माग राखेर गरेको आन्दोलनका कारण अबरुद्ध सवारी संचालन स्थानीय सरकारले छुट्टाछुट्टै कार्यदल बनाएर हल गर्ने सहमति गरेसंगै भाडाका सवारी चल्न थालेका हुन् ।

गत मंगलबार सुवर्णपुरका आन्दोलनकारी संग रेडियोबिजयबस्तिको कार्यालयमा भएको वार्तामा अधिकार सम्पन्न उच्चस्तरीय कार्यदल बनाउन स्थानीय सरकार लचिलो भएपछि आन्दोलनकारी एक सातासम्म्को लागि यात्रुबाहक सवारी चल्न दिन सहमत भएका थिए।

त्यस्तै हिजो ईलाका प्रहरी कार्यालय ठोरीमा भएको वार्तामा पनि उच्चस्तरीय अधिकार सम्पन्न कार्यदल बनाउन गाउँपालिका सहमत भएपछि वडा न ३ का आन्दोलनकारीले पनि चैत २ गतेसम्म सबै सवारी संचालन गर्न दिने सहमति गरेका थिए।

छुट्टाछुट्टै कार्यदल बनाएर दुबै तर्फका आन्दोलनकारीहरुका असन्तुष्टिहरुलाई प्याकेजमा छ्लफल गर्न गाउँपालिकाले १३ सदस्यीय कार्यदल गठन गर्ने सहमति गरेको छ।सुवर्णपुरको असन्तुष्टि हल गर्न १३ सदस्यीय कार्यदल गठन भैसकेको छ भने वडा ३ को समस्या हल गर्न कार्यदल गठनको प्रक्रिया सुरु भैसकेको छ।

तपाईं हामीसंग फेसबुक र ट्वीटर मार्फत् पनि जोडिन सक्नुहुन्छ ।