बीरगंज । मधेश प्रदेशका पर्सा देखी सप्तरी सम्मका आठ जिल्ला अहिले अनधिकृत कारोवारको मुख्यकेन्द्र बनेको छ ।

राजस्व छलीको कारोवारको मुख्य केन्द्र बनेकै कारण भंसार राजस्व असुलीको लक्ष्य प्राप्त गर्न भंसार कार्यालयहरु असफल भएका छन ।

सीमाको छेउमा बसेर सीमाको रक्षा र अनधिकृत कारोवारको रोकथाम गर्न जिम्मेवारी पाएको सशस्त्र प्रहरी र नागरिकको ज्यान धनको सुरक्षाको जिम्मा पाएको नेपाल प्रहरीको प्रदेश नेतृत्व नै अनधिकृत कारोवारबाट आउने प्रतिफल कुम्लाउन अभ्यस्त रहेकोले तस्करी बढ्ने र राजस्व चुहावट बढने भएको छ ।

यत्रो जनशक्ति परिचालन भएको छ तर पनि राजस्व संकलन अपेक्षाकृत सफल हुन सकेको छैन । भंसारका एक अधिकृत भन्छन त्यही कारण राजस्व संकलन प्रभावित भयो ।

स्वय भंसार कार्यालय र त्यसका प्रमुखहरुको कार्य सम्पादनमा अनेकौ प्रश्न नउठेका भने होइनन । ठूल्ठूला ब्यापारी र तस्करहरुलाई भन्सारले नै सुबिधा प्रदान गरी एउटै प्रज्ञापन पत्रबाट ३र४ खेप सामान ल्याउने अवसर प्रदान गरेको बीरगंज भन्सारका एक कर्मचारीले नाम उल्लेख नगर्ने शर्तमा बताए ।

सशस्त्र प्रहरी, नेपाल प्रहरी भंसार कार्यालयहरु र प्रधानमंत्री मातहत रहेको राजस्व अनुसन्धान बिभागको भ्रष्ट कर्मका कारण राजस्व घटने र गैर कानूनी काम गर्नेहरुले नाजायज ढंगबाट कुस्त कमाउने बतावरण बनेको छ ।

नेपाल प्रहरीका मधेश प्रदेशका प्रमुख डीआईजी पोखरेलले नै सरुवा भएका प्रहरी कर्मचारीलाई रमाना नदिई बारा र पर्साको घुमुवाका रुपमा अतिरिक्त कमाईका लागि खटाएका छन् ।

प्रहरी मुख्यालले गरेको सरुवालाई चुनौती दिएर बारा पर्सामा डीआईजीका लागि भन्सार राजस्व छलेर कारोवार गर्नेहरुसँग डिल गर्नमा परिचालित गरेका छन् ।

मधेस प्रदेशका प्रहरी प्रमुख डीआईजी यज्ञविनोद पोखरेलले प्रदेशभर आधा दर्जन भन्दा बढी घुमुवा खटाएर असुली धन्दालाई बढावा दिएको प्रहरी स्रोत बताउँछ ।

आफ्नो जागिरे जीवनमा रौतहटको प्रमुख र मधेश प्रदेश जनकपुरमा एसएसपी बसेका डिआइजी आय आर्जनबारे ब्यापक अनुभव छन त्यसकै कारण उनले हिजोका दिनमा तस्करसंग नेटवर्क बनाएका प्रहरी कर्मचारी परिचचालन गरेका छन ।

पोख्रेलले धनुषामा सुरेन्द्र ठाकुर,पर्सा जिल्लामा कार्यरत असई प्रमोद सिंह, प्रज राजकुमार गुरुङ, प्रहरी हवल्दार उपेन्द्र यादव सर्लाही, प्रबह सुरेन्द्र ठाकुर जनकपुर र प्रह शैलेश पटेल बारा जिल्लामा डीआईजी पोखरेलले असुलीको लागि खटाएको प्रहरी स्रोत बताउँछ।

बारा जिल्लामा कार्यरत असई वीरेन्द्र यादवलाई पनि समन्वयको लागि परिचालन गरिएको स्रोतले बताएको छ ।सर्लाहीको नारायणपुर, संग्रामपुर, त्रिभुवन नगर र खुटौना, महोत्तरी जिल्लाको मटिहानी, मारुवाही र सम्सी नाकाबाट ब्यापक तस्करी भइरहेको स्थानीयसमेत बताउँछन् ।

यसैगरी सिरहा जिल्लाको माडर, ठाडी, बरियार पट्टी, चतरी र झाँझपट्टी नाका र सप्तरीको छिनमस्ता, नर्घो, बेल्ही, पातो, बोदे वर्षाइन र स्वर्णपट्टी नाकाबाट तस्करी भारी मात्रामा भइरहेको छ ।

भारतबाट खाद्यान्न, लत्ता कपडा, मोटर पार्ट्स, इलेक्ट्रोनिक्स आइटम, प्याज, पान मसाला, सुर्ती नेपालतर्फ आइरहेको छ भने भारततर्फ चिनियाँ स्याउ,रक्सी र लसुन गइरहेको छ ।