काठमाडौं । साउन २ मा विमानस्थल भन्सारबाट जाँच पास भएर बाहिरिएको तस्करीको सुन र राजश्व अनुसन्धान विभागले टोखामा फेला पारेको सुनको फ्याक्ट्रीसँग मिल्दोजुल्दो कारोबारमा गृह मन्त्रालय मुछिएको छ ।

प्रहरीको केन्द्रीय अनुसन्धान ब्यूरोले गरिरहेको सुनको अनुसन्धानमा तस्करीका नाइके दावा छिरिङ र गृहमन्त्रालयको सबै भन्दा महत्वपूर्ण मानिने अध्यागमन विभागका महानिर्देशक झलकराम अधिकारी बीच सुन तस्करीको पूर्व सूचना आदान–प्रदान र रकम लेनदेनको प्रमाण फेला परेको हो ।

महानिर्देशक अधिकारी र दावाबीच पानी तान्ने मोटर, यसको प्याकेजिङ आयात र आदान प्रदानको बिषयमा कुराकानी भएको तथ्य सार्वजनीक भएको छ । अधिकारी र दावाको वीच्याटमा त्यसपछि पनि दुवै जनाका लागि राम्रो बिजनेस भएको र ठूलो परिमाणमा नगद कारोबारको कुराकानी भएको प्रमाण पनि देखिन्छ ।

तस्कर समूहले आयात गर्ने तस्करीको सुनको विवरण अध्यागमन विभागका महानिर्देशकमार्फत गृहमन्त्रालय र सुरक्षा निकायलाई पुग्ने गरेको अनुसन्धानमा संलग्न अधिकारीहरु बताउँछन् । १४ साउनमा ठमेलको भियाना होटलबाट दावा छिरिङ पक्राउ परेका थिए ।

‘हाल गृह मन्त्रालय मातहतको अध्यागमन विभागको महानिर्देशकको जिम्मेवारीमा रहेका सह–सचिव झलकराम अधिकारी र दावाबीच लामो कुराकानी हुने गरेको र ति सबै विमानस्थलबाट सुन पास गराउने र रकम लेनदेनसँग सम्बन्धित देखिएको छ,’ सीआईबी स्रोतले भन्यो, ‘कुन वस्तुभित्र राखेर सुन ल्याइँदैछ भन्ने जानकारी दावा छिरिङले अधिकारीलाई पहिल्यै पठाउँथे ।

सोही आधारमा अधिकारीले सुन पास गराउन गृह मन्त्रालयको सबै प्रबन्ध मिलाउने गर्दथे । त्यसैको आधारमा अधिकारीले दावासँग मोटो रकम बुझ्थे । अहिले भेटिएको प्रमाण टोखाको फ्याक्ट्रीमा बरामद भएको सुन झिकिएको मोटर, मिक्चर लगायतका विद्युतीय उपकरणसँग मिल्दोजुल्दो छ ।’

अधिकारीलाई दावाले पानी तान्ने मोटरमा सुन आएको भन्दै सहजीकरणका लागि अनुरोध गरेका छन् ।

दावाको प्रस्तावमा सहमति जनाएर अधिकारीले ‘ओके’ भन्ने जवाफ फर्काएका छन् । त्यसको तेस्रो दिन अधिकारीलाई दावाले ‘राम्रो काम भएकोमा धन्यवाद भन्दै राम्रो पैसा उपलब्ध गराएको’ उल्लेख गरेका छन् ।

जवाफमा अधिकारीले ‘फेरि–फेरि यस्तै कार्य भइरहने’ वचन दिएका छन् । महानिर्देशक अधिकारी प्रधानमन्त्री पुष्पकमल दाहाल ‘प्रचण्ड’ र गृहमन्त्री नारायणकाजी श्रेष्ठका विश्वास पात्र हुन् ।

अनुसन्धान अधिकारीहरुकाअनुसार महानिर्देशक अधिकारी र दावाबीच २०७८ असार ७ देखि यता निरन्तर संवाद हुने गरेको देखिएको छ । ५ साउन २०७९ देखिका संवादमा भने राम्रो काम भएको भन्दै रकम लेनदेनका कुराकानी छन् ।अधिकारी गृहमंत्री श्रेष्ठका निकै भर लाग्दा मान्छे हुन ।

श्रेष्ठकै जोडबलमा उनी ०७९ फागुणमा अध्यागमनको हाकीम भएका थिए । ०७९ को १७ चैतमा नारायणकाजी श्रेष्ठ भौतिक तथा यातायात मन्त्रालय छोडेर उपप्रधानमन्त्री र गृहमन्त्रीको जिम्मेवारीमा आए । त्यसको ठिक एक महिनाअघि १६ फागुनमा अधिकारीले अध्यागमन विभागको प्रमुखको जिम्मेवारी सम्हालेका थिए ।