वीरगंज । वीरगञ्ज महानगरपालिका वडा नं.१३ मुर्ली सोमबार  विभिन्न राजनीतिक दल परित्याग गर्दै करिब अढाई सयभन्दा बढी नेता–कार्यकर्ता नेपाली काँग्रेसमा समाहित भए ।

  प्रतिनिधि सभा निर्वाचन नजिकिदै जाँदा भएको यो बृहद् प्रवेश कार्यक्रमले नेपाली कांग्रेसलाई मनोबैज्ञानिक रुपमा पनि उत्सहित बनाएको छ । 

नेपाली काँग्रेस मुर्लीका बुथ सभापति कबिर अन्सारीको अध्यक्षतामा सम्पन्न कार्यक्रममा नेकपा एमाले, जनता समाजवादी पार्टी लगायतका दल परित्याग गरी करिब १ सय ५० पुरुष र १ सय महिला—काँग्रेसमा प्रवेश गरेका हुन्। युवाको उत्साह र महिलाको सक्रिय सहभागिताले कार्यक्रमलाई थप जीवन्त बनाएको थियो।

नवप्रवेशीहरूलाई पर्सा क्षेत्र नं. १ का प्रतिनिधि सभा सदस्य पदका उम्मेदवार अनिल रुङटाले फुलमाला र गम्छा ओढाएर हार्दिक स्वागत गरे।

उनले  युवाको जोश र परिवर्तनको चाहनाले पार्टीलाई अझ बलियो र गतिशील बनाएको बताउँदै देश विकास, सुशासन र ‘समृद्ध नेपाल’ निर्माणको साझा अभियानमा काँग्रेस दृढ रहेको धारणा राखे ।

 साथै, समुदायबीच भ्रम र विभाजन फैलाउने तत्वबाट सचेत रहन आग्रह गर्दै सद्भाव, भाइचारा र शान्तिको पक्षमा मत दिन अपिल गरे।

कार्यक्रमकी प्रमुख अतिथि नेपाली काँग्रेसकी सहमहामन्त्री डा.डिना सङ्ग्रौला पन्तले ऐतिहासिक परिवर्तन र लोकतान्त्रिक आन्दोलनमा काँग्रेसको अग्रणी भूमिकाको स्मरण गराउँदै योग्य र सक्षम उम्मेदवारलाई भारी मतले विजयी बनाउन आग्रह गरिन।

युवाको उज्ज्वल भविष्य, महिला सशक्तीकरण र समृद्ध राष्ट्र निर्माणका लागि काँग्रेसको ‘रुख’ चुनाव चिन्हमा मतदान गर्न उहाँले भावनात्मक अपिल गरिन।

त्यसैगरी, नेपाली काँग्रेस पर्साका कार्यवाहक सभापति रामनारायण कुर्मी, प्रदेश सदस्य ताज अलि, , क्षेत्र नं. १ का क्षेत्रीय सभापति अरविन्द गुप्ता, उपसभापति अनिल सिंह, वीरगञ्ज महानगरका सचिव शिवचन्द्र यादव युवा नेता रुस्तम शेख, नेपाल महिला संघकी केन्द्रीय सदस्य किरण सरकार, नेविसंघका केन्द्रीय सदस्य सुरेन्द्र लामिछाने लगायतका नेताहरूको उल्लेखनीय उपस्थिति रहेको थियो। वक्ताहरूले उम्मेदवार रुङटा मैदानमा आएपछि निरन्तर अन्य पार्टीका नेता–कार्यकर्ता काँग्रेसमा प्रवेश गरिरहेको उल्लेख गर्दै संगठन झन् मजबुत बन्दै गएको दाबी गरे।

वक्ताहरूले वीरगञ्जमा देखिएको जलसंकट, विकास निर्माणमा देखिएको अनियमितता तथा भ्रष्टाचारप्रति चिन्ता व्यक्त गर्दै स्वच्छ, पारदर्शी र जनउत्तरदायी नेतृत्वको आवश्यकता औँल्याए। पर्सा क्षेत्र नं। १ को समग्र विकास र सुशासनका लागि अनिल रुङटालाई विजयी बनाउन सबैलाई आह्वान गरियो।

मुर्लीमा आयोजित यस बृहद् प्रवेश कार्यक्रमले पर्सा क्षेत्र नं। १ मा काँग्रेसप्रति विशेषगरी युवा र महिलाको आकर्षण तीव्र रूपमा बढ्दै गएको संकेत गरेको छ। स्थानीय जनसमर्थनको उभारसँगै निर्वाचन प्रतिस्पर्धा थप रोचक र रोमाञ्चक बन्दै गएको राजनीतिक वृत्तमा चर्चा छ।