नेपाली सेनाद्वारा शीतलहर पीडितलाई राहत वितरण

1/12/2018 गते 00 00 मा प्रकाशित 1338 पटक पढिएको

वीरगन्ज, २८ पुस । तराईमा चलिरहेको शीतलहरबाट पीडितहरुलाई राहत स्वरुप कम्बल वितरण गर्ने कार्य जारी रहेको छ ।

जिल्ला दैवि प्रकोप उद्धार समितिको बैठकको निर्णय अनुसार जिल्लामा रहेको विभिन्न निकायहरुले आ–आफ्नो श्रोतबाट समितिको समन्वयमा जिल्लाका रहेको अति विपन्न, गरिब, असहाय, बृद्धवद्धा, महिला, बालबालिका तथा अनाथ शीतलहर पीडितहरुलाई नेपाली सेनाले पनि राहत वितरण गरेको छ ।

वीरगन्जको श्रीपुरमा रहेको श्री चण्डी प्रसाद गणका गणपति प्रमुख सेनानी जनबहादुर मल्लको नेतृत्वमा गएको सेनाको टोलीले पर्साको सखुवाप्रसौनी गाउँपालिका वडा नम्बर ५ महुवनमा रहेको दलित बस्तीका असहाय, गरिब तथा विपन्न ५० घरपरिवालाई ५० थान कम्बल वितरण गरिएको हो ।

गणपति प्रमुख सेनानी श्री जनबहादुर मल्लले ५० थान कम्बल वितरण गर्नुका साथै गरिबहरुलाई उनीको टोपी, विस्कुट र बालबालिकाहरुलाई दुध समेत वितरण गरेको छ । नेपाल रेडक्रस महुवन उपशाखाका सभापति गणेश राम र स्थानीय बासिन्दाहरुको रोहबरमा कम्बल तथा राहत वितरण भएको हो ।

कम्बल वितरण गर्दै गणपति प्रमुख सेनानी मल्लले नेपाली सेना देश र जनताको सुरक्षाको लागि सधैं अग्रपंक्तिमा रहने र दैवी प्रकोप तथा विपतमा पनि अगाडी रहेर समाज सेवामा समर्पित रहेको बताए ।

उनले अहिले तराईमा चलिरहेको शीतलहरले पीडित जनतालाई राहत होस् भनेर कम्बल लगायतका राहत सामग्री वितरण गरेको बताए । राहत वितरणका लागि नेपाली सेनालाई महुवन रेडक्रस उपशाखा तथा महुवनवासीले दिएको रेडक्रस पर्साका सहायक राजन श्रीवास्तवले जानकारी दिए ।