वीरगञ्ज । बीरगंजको नारायणी अस्पतालका चिकित्सक कर्मचारीहरुले पाँच मिनेट त्रिभूवन राजपथको अस्पताल अगाडिको सडक खण्ड जाम गरेका छन । 

उनीहरुले नारायणी अस्पतालको भवन निर्माणको वतावरण बनाउन पेशागत ड्रेस सहित सडक जाम गरेका हुन । चिकित्सकहरुले उपचार गर्ने भवन आवश्यक भएको भन्दै सडक धर्नामा उत्रिनु परेको बताएका छन ।

चिकित्सक कर्मचारीहरुको यो प्रर्दशनले  नारायणी अस्पतालको टेण्डर बिषयमा अदालतमा रहेको मुद्धाका बिषयमा पनि न्याय सम्पादन गर्ने निकायको ध्यानाकर्षण गराएको छ ।

ढिलो न्याय पनि अन्याय हो भन्ने स्थापित मान्यतालाई चिकित्सक कर्मचारीहरुको सडक जामले स्मरण गराएको छ । 

नारायणी अस्पताल मधेश प्रदेशमा संघीय सरकारले घोषणा गरेको एक मात्र केन्द्रीय अस्पताल हो ।

 टरसरी अस्पतालको रुपमा बिकास गर्ने उद्धेश्य अनुरुप ५०० शैयाको भवन निर्माणको लागि टेण्डर आह्वान भएपनि अहिले उक्त टेण्डरको विरुद्धमा अदालतमा मुद्दा परेपछि रोकिएको छ । 

त्यसैले नारायणी अस्पतालका चिकित्सकहरु भवन निर्माणको दबाव दिन संघर्ष समिति नै बनाएर धर्नामा बसेका हुन् । संघर्ष समितिले शुक्रबार विहान ११ बजेदेखि अस्पताल अगाडि सडकमै धर्नामा बसेका छन् ।

 अस्पतालको भवन निर्माणको लागि टेण्डर भएपनि अहिले उक्त टेण्डरमा कानूनी उल्झन आएको र निर्माणमा ढिलाई भएकोले चिकित्कस, स्वास्थ्यकर्मी, नागरिक समाज लगायत स्थानीयहरु सहित सडकमा ओलिएको संघर्ष समितिका संयोजक डा. निरज कुमार सिंहले जानकारी दिए ।

नारायणी अस्पतालको भौतीक संरचना निर्माणमा  बीरगंजका दाताहरुको योगदान छ ।  सरकारी र विकास समिति तर्फबाट ३०० शैय्यामा सञ्चालन भईरहेको छ ।

 प्रजातान्त्रिक, लोकतान्त्रिक र संघीय गणतान्त्रिक सरकारले एउटा पनि भौतिक संरचना अहिलेसम्म नबनाएको र वीरगञ्ज शहरका महान दाताहरूले बनाइदिएको पूरानो भौतिक संरचनाको भरमा अस्पतालले सेवा दिँदै आएको तितो यथार्थ रहेको संघर्ष समितिका संयोजक डा.सिंह बताउछन्।

आर्थिक वर्ष २०७४÷७५ को एकीकृत स्वास्थ्य पूर्वाधार विकास कार्यक्रम अन्तर्गत नेपाल सरकारले प्रत्येक प्रदेशमा ५०० शैय्याको अस्पताल निर्माण गर्ने योजना अनुरूप मधेस प्रदेशको एकमात्र केन्द्रीय अस्पताल नारायणी अस्पतालको भवन अनुमानित लागत १ अर्ब ५५ करोड ५३ लाख ८४ हजार ७५ रूपैयाँमा टेन्डर प्रक्रिया अगाडि बढेर एकमात्र बोलपत्रदाता एनडीई भिसीपीआईएसएस ललितपुर पुल्चोक ले टेन्डर पाएको थियो।

 बोलपत्र निर्माण प्रक्रियामा पूर्णता परीक्षण गर्दा एउटा कम्पनीको राजस्व दाखिला नदेखिएपछि सहरी विकास तथा भवन निर्माण विभाग र टेन्डर कम्पनीको विवाद अदालतको न्यायिक निरुपणको प्रक्रियामा रहेको छ। अस्पतालको जीर्ण भवनले गर्दा यस क्षेत्रको जनताले निकै दुःख खेप्नु परेको छ ।

यस अस्पताल र यहाँका स्वास्थ्यकर्मीहरूले आफ्नो क्षमता अनुरुप पनि गरिब निमुखा जनतालाई सेवा दिन नसकेको तिथो यथार्थ तथा बाध्य भएर अरु सहरहरूमा बिरामी रेफर गर्नुपर्ने बाध्यकारी अवस्था रहेको नेपाल चिकित्सक संघका केन्द्रीय उपाध्यक्ष समेत रहेका संघर्ष समितिका संयोजक डा।सिंह बताउछन् ।

बारा पर्सा रौतहट सर्लाही तथा छिमेकी राष्ट्र भारतको गरिब जनताहरूको पनि आस्थाको केन्द्र रहेको यस यस अस्पतालले झण्डै ३० लाखभन्दा बढी नेपाली जनसङ्ख्यालाई सेवा दिँदै आएको गौरवशाली इतिहास छ। नाराणी अस्पतालको समस्याको विषयमा पर्साका सांसदहरूले संसदमा पनि जोडदार माग उठाएकै हुन्।