उखुको मूल्य तोक्न माँग गर्दै लाक्रो सहित राजमार्गमा किसानको परेड

इसीमाना सम्वाददाता २०८० मंसिर ३० गते ०५: ३० मा प्रकाशित 335 पटक पढिएको

हरिवन। उखुको मूल्य तोक्न माँग गर्दै सर्लाहीको हरिवनमा उखु किसानले उखुको लाक्रा बोकेर प्रर्दशन गरेका छन ।

उखुको मुल्य तोक्न र उखु किसानको बाँकी रहेको रकम भूक्तानीको माँग राखेर उनीहरु प्रर्दशनमा उत्रिएका हुन । हरिवन बजारबाट शुरु भएको किसानको प्रर्दशन इन्दुशंकर चीनीमिल हुदै पूनः हरिवन बजारमा आएर सभामा परिणत भएको थियो ।

आन्दोलनको तयारी स्वरुपमा हरिवनमा हिजो मात्र किसानहरुको भेला सम्पन्न भएको थियो । यो वर्ष किसानले उखुको मूल्य प्रति क्वीन्टर ७ सय ५० हुनु पर्ने माँग राखेको अखिल नेपाल किसान महासंघकी नेतृ अन्जना कडरियाले जानकारी दिइन ।

सरकारले गत वर्षको ७० रुपैया मध्य २१ रुपैया मात्र भूक्तानी दिएको र भूक्तानी दिन बाँकी ४९ रुपैया भुक्तानी दिन माँग गरेका छन । उखु काटेर बेच्ने बेला हुदा समेत सरकारले उखुको मूल्य नतोकेर राज्यबिहिनताको अवस्था बनाईदिएकोले उखु किसान निराश भएको नेतृ कडरियाको भनाई छ ।

उखुको मूल्य नतोकी उखु क्रसिङ नगर्न किसानले उधोगलाई अपिल गरेका छन । चीनीको बढदो मूल्य र उखु उत्पादनको लागतलाई ध्यानमा राखेर यो वर्ष उखुको मूल्य ७ सय ५० तोकिनु पर्ने नेपाल उखु उत्पादक महासंघका अध्यक्ष कपिलमुनी मैनालीको भनाई छ ।

मंसीर २५ गते कृषि मंत्रालयको बार्तामा उखुको मूल्य ५ सय ६५ गरिएकोमा किसानले त्यसलाई अस्वीकार गरेका थिए । गत वर्ष सरकारी अनुदान सहित उखुको मूल्य ६ सय १० रुपैया कायम भएको थियो ।