फेटाका लेखापाल अख्तियारको फन्दामा, लहरो तान्दा पहरो थर्कने

7/13/2018 गते 00 00 मा प्रकाशित 2789 पटक पढिएको

बीरगंज २९ असार ।

बाराको फेटा गाउँपालिकाका लेखापाल सौरभ साह ३० हजार रुपैया घुस रकम सहित पक्राउ परेका छन । उनलाई अख्तियार दुरुपयोग अनुसन्धानको हेटौडाको टोलीले रंगेहात पक्राउ गरेको हो ।

सौरभको गिरफतारीले फेटा गाउँपालिकामा लहरो तान्दा पहरो थर्कने उखान चरितार्थ हुने भएको छ । लेखापाल साहले प्रमुख प्रशासकीय अधिकृत उमाशंकर चौधरी र गाउँपालिका प्रमुख अमिरि प्रसाद कलवारको निर्देशनमा घुस रकम उठाउने गरेको बयान दिएको स्रोतले बताएको छ ।

गाउँपालिका प्रमुख र प्रशासकीय अधिकृतले आफना नजिकका वडाध्यक्षको वडामा गएको बजेटको योजनाहरु अनुगमन र सुपरिवेक्षण बिना पनि भूक्तानी दिने गरेका थिए । यसरी भूक्तानी दिदा कमशीनको ब्यवस्थापन भने लेखापाल साहले गर्दै आइरहेका थिए ।

बिपक्षी वडाध्यक्षहरुको वडामा गएको योजनाको अनुगमन सुपरिवेक्षण प्राविधिक परिक्षण सबै हुदा समेत भूक्तानी नदिने गरेको बताइएको छ । कमीशन बिना भूक्तानी नदिएर सास्ती दिने गरेको एक भूक्तभोगीले बताए । साहले ग्रामिण सचेतना केन्द्र संस्थासँग एच आई भि एडस सम्बन्धि लक्षित वर्गको कार्यक्रमको संचालन पछिको भुक्तानी दिदा ३० हजार कमशीन घुस मागेको त्यही रकम लिएको अवस्थामा साह रङ्गेहात पक्राउ परेको अख्तियारको टोलिले जनाएको छ ।

साहका कारण सास्ती पाएका एक जनाले अख्तियारमा गुनासो गरेपछि अख्तियार पनि एक्सनमा आएको हो । अख्तियार दुरुपयोग अनुसन्धान कार्यालय हेटौडाका प्रहरी नायव उपरिक्षक दिनेश घिमिरेको नेतृत्वको टोलीले लेखापाल सौरभ साहलाई घुस रकम नगद ३० हजार सहित पक्राउ गरेको हो ।

साहले पुरानो मितिमा गाउपालिकाले कार्यक्रम दिईरहेको र कमिशन लिई चेक बनाईरहेको सुचनाको आधारमा उनलाई पक्राउ गरिएको घिमिरेले बताएका छन ।
निजले गाउपालिकामा सञ्चालित लक्षित वर्गको कार्यक्रममा सँघ संस्थासँग कमिसन लिने गरेको स्रोतले जनाएको छ ।

महागढीमाई नगरपालिकामा कार्यरत रहदा समेत साहलाई अनियमितताको आरोप लागेको थियो । समाजको हितकोलागि केही गर्लान की भन्ने आश गरिएको एक जना युवा भ्रष्टाचारमा संलग्न भएको पाइनु चिन्ताजनक भएको एक स्थानीयले बताएका छन ।

आश गरिएका युवाहरु कुवाटोमा लाग्नु समाजका निम्ति दुःखद भएको ती स्थानीयको भनाइ छ । तर साहले भने आफूलाई फसाइएको बताएका छन । काम गरिरहेको अवस्थामा एक जना अपरिचित व्यक्ति कार्यालयमा प्रवेश गरि पैसा फालेको र त्यो लगतै छापामार शैलिमा आफूलाई समातिएको लेखापल साहले बताएका छन ।