क्रिकेटर प्रविण र एसईईमा सर्वोत्कृष्ट नतिजा ल्याउने साह वीरगंज महानगरद्वारा सम्मानित

इसीमाना सम्वाददाता २०८१ मंसिर ९ गते ०७: १२ मा प्रकाशित 212 पटक पढिएको

वीरगंज । नेपाली महिला टोलीलाई विश्वकप क्रिकेटसम्मको यात्रामा योगदान पु¥याउने वीरगंजकी क्रिकेट खेलाडी साना प्रविण र यस वर्षको एसईई परीक्षामा पर्सा जिल्ला प्रथम भएकी रिया साहलाई वीरगंज महानगरपालिकाले आइतबार एक कार्यक्रमकाबीच सम्मान गरेको छ ।

महानगरपालिकाले नेपाली क्रिकेट टोलीकी खेलाडी वीरगंजकी प्रविणलाई नगद ५१ हजार रुपैयाँ सहित सम्मान गरेको हो । यस्तै रिया साहलाई उनको उच्च शिक्षा अध्ययनमा थप हौसला प्रदान गर्न ल्यापटप सहित सम्मान गरेको छ ।

प्रविणले भर्खरै सम्पन्न यू–१९ टी–२० महिला एसिया क्वालिफायरमा थाइल्याण्ड वीरुद्धको खेलमा अर्धसतक प्रहार गर्दै नेपालको कीर्तिमानी साझेदारी गरेकी थिइन् । प्रविण नेपालकी ओपनर व्याट्सम्यान हुन् ।

यस्तै २०८० सालको माध्यमिक शिक्षा परिक्षा (एसईई) मा पर्सा जिल्लामै सर्वोत्कृष्ट अंक ३.९७ जीपीए ल्याएर रिया साह उत्तीर्ण भएकी हुन् ।

दुबै जनालाई महानगरपालिकाका प्रमुख राजेशमान सिंह र उपप्रमुख इम्तियाज आलमले संयुक्त रुपमा नगद र ल्यापटप हस्तान्तरण गरेका थिए । कार्यक्रममा बीरगंज महानगरपालिकाका निमित्त प्रमुख प्रशासकीय अधिकृत अरविन्द लाल कर्ण ,नेपाल क्रिकेट संघ पर्साका अध्यक्ष मनिष सिंह लगायतको सहभागिता रहेको थियो ।

तपाईं हामीसंग फेसबुक र ट्वीटर मार्फत् पनि जोडिन सक्नुहुन्छ ।