वीरगन्ज, ३ मंसिर । विभिन्न समयमा विभिन्न किसिमका चन्दा आतंकले पीडित बनेका वीरगन्जका उद्योगी व्यवसायी प्रतिनिधिसभा तथा प्रदेशसभा निर्वाचनमा पनि वीरगन्जका उद्योगी व्यवसायीहरु चन्दा आतंकबाट पीडित भएका छन् । 

 आर्थिक तथा औद्योगिक नगरीमा पहिलेदेखि नै बढी चन्दा असुलीको शिकार बन्ने गरेका वीरगन्जका उद्योगी व्यवसायीहरु मंसिर १० र २१ गते हुन लागेको प्रतिनिधिसभा र प्रदेशसभा निर्वाचनमा पनि दलका चन्दाका लागि दलको निशानामा परेका हुन् । हरेक दिन दलका नेताहरुले निर्वाचन खर्चका लागि फोन गर्ने गरेको नाम नछाप्ने शर्तमा एक उद्योगीले बताए । 
     उनले भने, “सशस्त्र भूमिगत समूहले भन्दा पनि बढी चन्दा आतंक हुन थालेको छ । जनताको हित र देशको आर्थिक विकास हुन्छ भनेर गराईने निर्वाचनमा चन्दा आतंकबाट उद्योगी व्यवसायीहरु पीडित हुनुपर्छ भने किन निर्वाचन गराउने ? उनले प्रश्न गरे । चन्दा सहयोग गर्न दबाब बढेपछि कतिपय उद्योगी व्यवसायीहरु वीरगन्जबाट बाहिर जानथालेको ती व्यवसायीको भनाइ छ । 
         निर्वाचनमा उम्मेदवार बनेर जनाधार नभएका उम्मेदवारहरुले निर्वाचन खर्चका लागि चन्दा मागिरहेका छन् । “निर्वाचनमा उम्मेदवार बनेर चन्दा माग्ने अनि त्यहि पैसालाई दूरुपयोग गर्ने गरेका छन्, चन्दा लिएर चुनाव लड्ने भएपछि स्वच्छ निर्वाचन पनि हुन सक्दैन ।” एक उद्योगीले कारोबारसँग भने । चन्दा लिएर जितेकाहरु पनि फर्केर आउदैनन् ।
          वीरगन्ज पथलैया औद्योगिक करिडोरका उद्योगी व्यवसायीहरुलाई पर्साका मात्रै होईन बारा, रौतहटबाट पनि चन्दा सहयोग दिन दबाव आउने गरेको छ । राजनीतिक दलहरुलाई चन्दा दिनुपर्ने दबावले वीरगन्जका उद्योगी व्यवसायीहरु तनावमा रहने गरेका छन् । उम्मेदवारहरुले जित्नको लागि व्यापक खर्च गर्ने गरेका कारण निर्वाचन खर्चिलो हुने गरेको छ । 
           उद्योगी व्यवसायीहरुले चन्दा सहयोगका लागि चेक मार्फत भुत्तानी गर्न खोजेपनि राजनीतिक दलका नेताहरुले चेक लिन नमान्ने गरेको उनीहरुको भनाई छ । चन्दा आतंकले व्यवसायीहरु पीडित भएको गुनासो बढेपछि निर्वाचन आयोगले पनि उम्मेदवारहरुलाई दिईएको चन्दा सहयोग हिसाब गरेर राख्न आग्रह गरेको छ । 
          तर, त्यो हिसाब राख्न राख्न सम्भव नभएको उद्योगी व्यवसायीहरुको भनाई छ ।

वीरगन्ज उद्योग वाणिज्य संघका प्रशासकीय अधिकृत मनोज उपाध्याय भन्छन्, “चन्दा माग्ने त्यस्ता कयौं उम्मेदवारहरु हुन्छन्, बैंकको चेक लिन मान्दैनन् कसरी सम्भव हुन्छ हिसाब राख्न ?” सबै राजनीतिक दलका नेताहरुले चन्दा माग्ने गरेको र लिन आफै नआएर कार्यकर्तालाई पठाउने गरेकोले  हिसाबकिताब राख्नलाई सम्भव नहुने गरेको उपाध्यायको भनाई छ ।