चर्पी नहुने सेवाग्राहीलाई वडा बाट दिइने सेवामा बन्देज

4/17/2018 गते 00 00 मा प्रकाशित 1035 पटक पढिएको

सीमरा ४ बैशाख । जितपुरसिमरा उपमहानगरपालिका वडा नं. १७ लाई खुलादिशामुक्त बनाउने अभियान अन्तर्गत मंगलबार वडाको जैतापुर स्थित स्थानीय विद्यालय परिसरमा वडास्तरीय भेला सम्पन्न भएको छ ।

जितपुरसिमरा उपमहानगरपालिकाले आयोजना गरेको भेलाका सहभागीहरुले अहिले सम्म चर्पी नबनाउने परिवारलाई यही बैशाष मसान्त सम्म चर्पी बनाउन अन्तिम मौका दिने निर्णय गरेको छ ।

भोलीबाटै अभियानलाई प्रभावकारी बनाउन सरसफाई कार्ड वितरण गर्ने, जनचेतना अभियान चलाउने समेत निर्णय गरेको छ ।

तोकीएको अवधिमा चर्पी बनाउन अटेर गर्ने परिवारका सदस्यहरुको आगामी जेठ १ गतेदेखी वडाबाट प्रदान गरिने सेवामा बन्देज लगाउने सम्मको निर्णय भएको वडा नं.१७का अध्यक्ष नवराज खड्काले जानकारी दिए ।

खड्का अनुसार स्थानीय संघ संस्था, सुरक्षा निकाय ,स्वास्थ्य, शिक्षा लगायतका क्षेत्रबाट पाउने सेवासुविधामा पनि अंकुश लगाउन सक्ने सम्मको अधिकार भेलाले दिएको छ ।

अध्यक्ष खड्काको संयोजकत्वमा स्थानीय संघसंस्था, सेवा प्रदायक निकायका प्रतिनिधि,जनप्रतिनीधिहरु सम्मीलित २३ सदस्यीय सरसफाई स्वच्छता समिति गठन गरिएको छ ।

वडा नं. १७ मा ८सय घरधुरी रहेकोमा ५सय २३ मा चर्पी भएपनी ३ सय ६५ घरमा चर्पी नरहेको कार्यक्रमका सहजकर्ता सरसफाई प्रज्वलक सुशिल चौधरीले बताए ।

विशेष गरि जैतापुर र रामनगरको रघुनाथपुर चौधरी तथा दलित बस्तीमा ७५ प्रतिशत घरमा चर्पी नभएको चौधरीले बताए । भेलामा सरसफाई अभियानका प्रतिनिधि, स्थानीय जनप्रतिनिधि, संघसंस्थाका प्रनिनीधि एवं सामाजिक अगुवाहरु गरी ५० जनाको सहभागिता रहेको थियो ।