वीरगन्ज, १६ बैशाख । मिस नेपाल वल्र्ड २०१८ की विजेता श्रृङखला खतिवडा आईतबार चर्को घाममा पनि पर्साको वीरगन्ज महानगरपालिका वडा नम्बर १८ सौराहामा महिलाहरुसँग व्यस्त भइन् । आफ्नी आमा तथा प्रदेश नम्बर ३ की प्रदेशसभा सदस्य एवं नेकपा मकवानपुरकी अध्यक्ष मुनु सिग्देलसँग आएकी श्रृङखलाले सौराहाका महिलाहरुलाई सरसफाई सम्बन्धी जनचेतनामूलक कुराहरुको बारेमा सिकाईन् ।

उनले महिलाहरुले महिनावारी हुने बेलामा आईपर्ने समस्या र त्यसको सहज व्यावस्थापनको बारेमा महिलाहरुलाई बताईन् । विशेषगरी तराई मधेसका महिलाहरु समाजको अगाडि आफ्नो शारिरिक स्वास्थ्य बारेमा खुलेर बोल्न नसक्ने भएकोले महिनावारी भएको बेला अपनाईनुपर्ने सावधानी र सरसफाई सामग्रीहरुको प्रयोगको बारेमा महिलाहरुलाई प्रयोगात्मक विधिबाट जानकारी गराईन् ।

२०७५ साल चैत १७ गते बारा र पर्सामा आएको हावाहुरीबाट प्रभावित १ हजार ७ सय परिवारका महिलाहरुका लागि संकलन गरिएको सरसफाई सामग्रीहरु वितरण गर्न आईतबार खतिवडा पर्सामा आएकी हुन् । टोर्नाडो नामक आँधीले प्रभावित पारेको बारा र पर्साका महिलाहरुको स्वास्थ्यलाई ध्यानमा राखेर सामाजिक सञ्जाल मार्फत संकलन गरिएको राहत सहयोगबाट महिलाको लागि महिला अभियानबाट ‘एक परिवार एक झोला’ नारा दिएर राहत संकलन शुरु गरिएको थियो ।

यसको मुख्य संयोजन ब्लड डोनर्स एशोसिएसन पर्साका सचिव अरविन्द सिंहले गरेका थिए । उनकै पहलमा महिलाहरुको मात्रै प्रतिनिधित्व रहेको भगिनी संस्था ‘वुमेन्स फर ब्लड’ समूहले राहत संकलनमा सहयोगी भूमिका निर्वाह गरेको थियो । हावाहुरीले प्रभावित क्षेत्रमा सबैले खाद्यान्न लत्ता कपडा, त्रिपाल लगायतका राहत सामग्रीहरु पु¥याए ।

तर, हावाहुरी पीडित महिला तथा किशोरीहरुको स्वाथ्यमा गम्भीर असर पार्ने सरसफाईको बारेमा ध्यान कम देखिएकोले सरसफाईकै कारणले महिलाहरुको शारिरिक स्वास्थ्य जोखिममा पर्नबाट बचाउनका लागि एक परिवार एक झोला अभियान थालेको अभियानका संयोजनकर्ता सिंहले बताए । चैत्र २२ गते देखि थालेको ‘एक परिवार एक झोला’ कार्यक्रममा देश तथा विदेशबाट नगद तथा जिन्सी विभिन्न किसिमको सहयोगहरु संकलन गरेर बाराको भरभवलिया, पुरैनिया, पचरौता रमपुरवा र पर्साको सुर्जाहा, चैनपुर लगायत प्रभावित क्षेत्रका १ हजार ७ सय घरपरिवारलाई सामग्री वितरण गरिएको छ ।

सहयोग सामग्री सामान्य व्यक्तिदेखि मिस नेपाल वल्र्ड २०१८ की श्रृंखला खतिवडा सम्मले सहयोग गरेको छ । उनले सामाजिक सञ्जाल मार्फत अभियानको जानकारी पाएर व्यक्तिगत नगद ५० हजार रुपैंया सहयोग समेत गरिन । आईतबार पर्साको सौराहामा पुगेर पीडित महिला तथा किशोरीहरुलाई महिनावारी हुँदा महिलाले प्रयोग गर्ने सेनिटरी प्याड तथा अन्य सरसफाई सम्बन्धी सामग्री प्रयोग गर्ने तरिका समेत सिकाईन् ।

महिलाहरुको लागि आवश्यक सामांग्रीहरु स्याम्पू, नुहाउने साबुन, लुगा धुने साबुन, सेनेटरीप्याड, भित्री वस्त्र, गम्छा, पेस्ट, ब्रस, टर्च, नेलकटर, लामखुट्टेबाट बच्न झूल लगायतका २१ सय मूल्य बराबरको सामग्रीहरु वितरण गरेर अभियानको समापन गरिन् ।

अभियानमा काभ्रे सेवा समाज बेल्जियम, नेपालगन्ज ग्यालरी, नेपाली कम्युनिटी इन फ्लोरिडा अमेरिका, नेपाली युथ इन बोस्टन (अमेरिका) इंग्ल्यैण्ड रिडङ, रिलिफ सोसाईटी अफ कमर्स वीरगन्ज, वीरगन्ज बैंकर्स ग्रुप, गंगालाल हृदय केन्द्र कर्मचारी परिवार लगायतका विभिन्न संघ संस्था र व्यक्तिहरुले समेत सहयोग गरेका थिए । हावाहुरीलाई वितरण गरिने राहत भन्दा सरसफाई सामग्री वितरण पृथक तरिकाले गरिएको थियो ।

वास्तविका पीडितहरुको घर घरमा पुगेर घरसंख्या संकलन गर्ने र सबैलाई एकठाउँमा बसाएर सरसफाई सम्बन्धी जनचेतना जगाउदै सरसफाई सामग्री प्रयोग गर्ने तरिका सिकाएर मात्रै वितरण गरिएको थियो ।