बीरगंज । जनता समाजवादी पार्टी पर्साका सचिव तवरेज अहमदले नेपालको शिक्षा नीतिमा आमूल परिर्वतनको खाँचो रहेको बताएका छन ।

लिभिङ विथ इन्भायरन्मेन्टले आइतवार बीरगंजको पब्लिक कलेजमा आयोजना गरेको “बीरगंज भूत बर्तमान भविष्य”बिषयक अन्तरसम्वाद कार्यक्रममा यस्तो बताएका हुन ।

उनले नेपालको शिक्षाले बेरोजगार मात्र उत्पादन गरेको आरोप लगाए । उनले नेपालको शिक्षा दुई वर्ग उत्पादनमा केन्द्रीत रहेकोले राज्यले शिक्षाको जिम्मेवारी लिनु पर्ने त्यसकोलागि शिक्षा नीतिमा आमूल परिर्वतन आवश्यक रहेको बताए ।

बिगतमा लामो समय शिक्षण पेशमा रहेका अहमदले शिक्षा परिवार समाज र राष्ट्रको प्रथामिकतामा पर्न नसकेको गुनासो गरे । उनले शिक्षा बिकासको मुल आधार भएकोले शिक्षामा परिवारका साथै राज्यको लगानी बढाउनु जरुरी रहेको बताए ।

कार्यक्रममा प्रतिनिधि सभाका सदस्य बिना जयसवालले वतावरणको संरक्षण र नागरिकको बिकासको चाहना पुरा गर्ने कुरामा आफूले प्रतिनिधि सभाकामा कुरा उठाउदै आएको बताइन । कार्यक्रममा डा.सुष्मा तिवारीले तीन तहको सरकारले शिक्षाको गुणात्मक बिकासकालागि ध्यान नदिएको बताइन ।

बीरगंज महानगर भित्रका ९० वटा सरकारी बिद्यालयको अनुगमनको अनुभव सुनाउदै द्विवेदीले पूर्वाधार निर्माणमा स्थानीय सरकारको ध्यान नगएको बताइन । कतिपय बिद्यालयमा शौचालय नरहेको सुनाउदै द्विवेदीले शैक्षीक वतावरण यस्तै रहे भविष्य झनै नाजुक हुने बताइन ।

कार्यक्रममा नेपाल पत्रकार महासंघका केन्द्रीय सदस्य के.सी.लामिछानेले पूर्वाधार निर्माणको काम मात्र बिकास हो भन्ने बुझाईमा परिर्वतन जरुरी रहेको बताए । उनले भौतिक पूर्वाधार विकास, आर्थिक विकास, सामाजिक विकास, सांस्कृतिक विकास, भाषिक विकास, बौद्धिक विकास, चिन्तन विकास अनि मनोवैज्ञानिक विकास जस्ता समग्र विकासका विविध पक्षहरू अन्तरनिहित हुने चर्चा गरे ।

उनले आवश्यकताको पहिचान, योजनाको निर्माण , कार्यान्वयन , अनुगमन मूल्यकांन र प्रतिफलको समान बितरणको प्रक्रिया पुरा हुदा मात्र बिकासको अवधारणले मूर्त रुप पाउने बताए ।

उनले जनसहभािगता मुलक बिकासको अवधारणलाई बंग्याएको चर्चा गर्दै नीति त ठिक थियो तर नियत ठिक नभएकोले अनियमितता बढेको बताए ।

कार्यक्रममा युवा उद्यमी अनुप अग्रवाल, सिद्धार्थ माध्यामिक बिद्यालयका प्रधानाध्यापक रमेश मिश्र पत्रकार बिमला गुप्ता लगायतले मन्तब्य ब्यक्त गरेका थिए । कार्यक्रमको सहजीकरण आकाश चौहानले गरेका थिए ।

यसैवीच संस्थाको तर्फबाट कार्यक्रमका अतिथिहरुलाई स्मरण पत्र बुझाइएको थियो । पत्रमा बीरगंजमा पर्यटकको हितका निम्ति सुविधा सम्पन्न शौचालयको आवश्यकता रहेको उल्लेख छ ।

त्यस्तै शहरमा खुला ठाउमा माछा मासुको बिक्री बितरण गर्नाले शहरको बैभवको छवि खल्लो पार्ने भएकोले यो समस्याको हल खोज्न सुझाव दिइएको छ । शैषीक संस्थानको वरिपरि रहेका धु्रमपानयुक्त पसलहरुलाई ब्यवीस्थत गर्न सुझाव दिइएको छ ।