चाँदीको गहनासहित रौतहटबाट भारतीय नागरिक साह र बारा बाट अन्य दुई जना पक्राउ

इसीमाना सम्वाददाता २०८१ कार्तिक ९ गते ०५: ०६ मा प्रकाशित 162 पटक पढिएको

गौर । चाँदीको गहनासहित भारतको सीतामढी जिल्ला असोगी टोलका ६२ वर्षीय चन्देश्वर साह सोनारलाई रौतहट प्रहरीले पक्राउ गरेको छ ।

मोटरसाइकल प्रयोग गरी अवैध कारोबारमा संलग्न भारतीय नागरिकलाई प्रहरीले शुक्रवार पक्राउ गरेको हो ।

करिब आठ केजी चाँदीका गहनासहित सोनार पक्राउ परेको रौतहट प्रहरी प्रवक्ता प्रहरी नायब उपरीक्षक दीपककुमार रायले जानकारी दिए ।

विआर ३० एफ ६६३५ नम्बरको मोटरसाइकल प्रयोग गरी सीमापारि वैरगनियाबाट नेपालतर्फ आउँदै गरेका साह गौर भन्सार कार्यालय अगाडि पक्राउ परेको प्रहरीले जनाएको छ ।

मोटरसाइकलको ट्याङ्कीमुनि प्लास्टिकमा लुकाइछिपाइ ल्याउँदै गरेको अवस्थामा प्रहरीले चादी फेला पारेको हो ।

त्यसैगरि बारा जिल्लाको जीतपुर सिमरा उपमहानगरपालिका वडा नं. २१ अमलेखगंजबाट करिब १४ किलो अवैध चाँदीका विभिन्न गरगहना सहित २ जनालाई शुक्रबार बिहान प्रहरीले पक्राउ गरेको छ ।

पक्राउ पर्नेहरूमा प्रसौनी गाउँपालिका ६ प्रस्टोका बस्ने ३३ वर्षीय सन्तोष साह सोनार र जीतपुर सिमरा उपमहानगरपालिका ८ गमरगावाटोल बस्ने २७ वर्षीय सुरेश महतो रहेका छन् ।

इलाका प्रहरी कार्यालय अमलेखगंज बाराबाट खटिएको प्रहरीले ना ५२ प २५८४ नम्बरको मोटरसाइकल चालक सन्तोष लाई करिब ९ किलो चाँदी र ना. ५५ प ३९३२ नम्बरको मोटरसाइकल चालक सुरेशलाई करिब ५ किलो चाँदी सहित पक्राउ गरेको हो । उनीहरूले मोटरसाइकलको ट्याङ्कीभित्र फल्स बटम बनाई लुकाई छिपाई उक्त चाँदी ल्याएको खुल्न आएको छ ।