वीरगन्ज । पर्सा जिल्लामा बैंकिङ प्रणालीको दुरुपयोग गरी अर्बौँ रुपैयाँ बराबरको शंकास्पद कारोबार गरिएको प्रकरणमा अदालतले एक जनालाई पुर्पक्षका लागि थुनामा पठाएको छ।

 यो घटनाले सीमावर्ती क्षेत्रमा फैलिएको हुन्डी सञ्जालको गहिरो जालो उजागर गरेको छ।

जिल्ला अदालत पर्साले वीरगन्ज महानगरपालिका–१ निवासी प्रशान्तकुमार गुप्तालाई संगठित अपराध, अवैध हुन्डी कारोबार तथा सम्पत्ति शुद्धीकरणसम्बन्धी मुद्दामा पुर्पक्षका लागि जेल चलान गर्ने आदेश दिएको हो। उनलाई प्रहरीले गत १७ पुसमा पक्राउ गरेको थियो।

सानो रकमबाट सुरु, अर्बौँ कारोबारसम्मको खुलासा

प्रहरीले प्रारम्भमा गुप्तालाई करिब ५० हजार रुपैयाँ नगदसहित पक्राउ गरेको थियो ।  सामान्य देखिने उक्त पक्राउपछि प्रहरीले उनको बैंक खातामाथि विस्तृत छानबिन सुरु गरेको थियो।

छानबिन क्रममा गुप्ताको विभिन्न बैंक खातामार्फत २ अर्ब ४१ करोड ७८ लाख २३ हजार ३ सय रुपैयाँ बराबरको अस्वाभाविक कारोबार भएको तथ्य फेला परेको पर्सा प्रहरी प्रमुख एसपी सुदिपराज पाठकले बताए।

प्रहरी स्रोतका अनुसार खातामा नियमित रूपमा ठूलो परिमाणमा रकम जम्मा र स्थानान्तरण हुने क्रम देखिएपछि अनुसन्धानको दायरा फराकिलो पारिएको थियो।

रक्सौल–वीरगन्ज जोड्ने हुन्डी सञ्जाल

अनुसन्धानबाट भारतको रक्सौल क्षेत्रबाट हुन्डीमार्फत नेपाली रुपैयाँ नेपाल भित्र्याई विभिन्न बैंक खातामा जम्मा गर्ने, त्यसपछि ती रकम अन्य व्यक्तिका खातामा स्थानान्तरण गरी स्रोत लुकाउने रणनीति अपनाइएको खुलेको छ।

प्रहरीले यो कार्य एक्लो व्यक्तिबाट सम्भव नहुने भन्दै संगठित सञ्जालको संलग्नता रहेको आशंका गरेको छ। यस सन्दर्भमा थप व्यक्तिहरूको भूमिकाबारे अनुसन्धान जारी रहेको बताइएको छ।

२ अर्ब ४१ करोड बिगो दाबी, ३३ लाख जफत

प्रहरीले गुप्ताविरुद्ध २ अर्ब ४१ करोडभन्दा बढी बिगो दाबी गर्दै मुद्दा दायर गरेको छ। साथै उनको खातामा रहेको ३३ लाख रुपैयाँभन्दा बढी रकम जफत गरिएको जनाइएको छ।

सम्पत्ति शुद्धीकरण अनुसन्धान विभागसँग पनि समन्वय भइरहेको प्रहरी स्रोतले जनाएको छ।

सीमावर्ती क्षेत्रमा बढ्दो चिन्ता

वीरगन्ज–रक्सौल नाका हुँदै सञ्चालन हुने अनौपचारिक वित्तीय कारोबार (हुन्डी) लामो समयदेखि सुरक्षाकर्मी र राजस्व निकायका लागि चुनौती बन्दै आएको छ।

 बैंकिङ प्रणालीकै प्रयोग गरी अवैध रकम ओसारपसार गरिएको यो घटनाले नियामक निकायहरूको निगरानी प्रणालीमाथि प्रश्न उठाएको छ।

विशेषज्ञहरूका अनुसार यस्ता कारोबारले राज्यको राजस्वमा क्षति पुर्‍याउने मात्र होइन, आपराधिक गतिविधि तथा कालो धन शुद्धीकरणलाई समेत प्रोत्साहन गर्ने जोखिम हुन्छ।

प्रहरीले यस प्रकरणलाई सीमावर्ती क्षेत्रमा सक्रिय अवैध वित्तीय सञ्जालमाथिको ठूलो कारबाहीका रूपमा लिएको जनाएको छ।