वीरगन्ज, १६ जेठ । मानव सभ्यताको कै चुनौतीको रुपमा देखा परेको कोरोना भाईरस संक्रमण नियन्त्रण र रोकथामका लागि अहोरात्र खटिएका वीरगन्ज महानगरपालिकाका मेयर विजय कुमार सरावगीलाई नागरिक समाजले पनि साथ दिने भएका छन् ।

महानगरपालिकामा शुक्रबार बसेको नागरिक समाजको भेलाले कोरोना नियन्त्रण र रोकथामका लागि मेयर सरावगीको सक्रिय भूमिकाको प्रशंसा गर्दै अहिलेको विषम परिस्थितिमा कोरोनासँग लड्न पूmटेर होईन जुटेर गर्नुपर्नेमा जोड दिए ।

भेलामा बोल्ने नागरिक समाजका अगुवाहरुले नागरिकलाई कोरोनाबाट बचाउनका लागि संघ र प्रदेश सरकारको भूमिका शुन्य देखिएको र स्थानीय सरकारको भूमिकामा कुनै कमी नदेखिएको बताए । नागरिक समाजका अगुवा प्राध्यापक डाक्टर दीपक शाक्यले कोरोना भाईरस नियन्त्रणमा कोही पनि एक्लै लड्न नसक्ने बताउदै कोरोनासँग लड्न महानगरपालिको साथमा सहयोग गर्नुपर्ने बताए ।

संकटको घडीमा नागरिकको जीवन रक्षा नै महत्वपूर्ण भएकोले महानगरपालिकाले गरेको सकारात्मक कामको सहयोग र नकारात्मक कामको आलोचना सहित सुधार गर्न नागरिक समाजको पनि महत्वपूर्ण भूमिका रहने बताए ।

अर्का अगुवा सुशील भट्टराईले संघ सरकारले कोरोना नियन्त्रणमा खासै भूमिका नखेलेको बताउदै प्रदेश सरकारको पनि उपस्थिति नहुँदा नागरिकमा निराशा छाएको बताए । उनले जनताको भोट लिएर जितेका प्रदेशका ८ जना विद्यायक र संघीय संसदमा रहेका ९ जना सांसद सहित १७ जना सांसदहरु पर्साका भएपनि कसैले वीरगन्जको नागरिकको विषयमा गम्भीरता नदेखाएकोमा गुनासो गरे ।

नेपाल चिकित्सक संघका केन्द्रीय सचिव डाक्टर निरज सिंहले भौगोलिक रुपमा वीरगन्ज मुख्य नाका भएकोले यहाँ वीरगन्जको मात्रै होईन नेपालभरीका नागरिक आउने भएकोले यो संकटको बेला स्थानीय वीरगन्जवासी र अन्य स्थानका नागरिकको जीवन रक्षाका लागि महानगरपालिकाले खेल्नुपर्ने भूमिकामा कुनै कमी नभएको बताए ।

लायन्स क्लब इन्टरनेशनलका पूर्व डाईरेक्टर सञ्जय खेतानले कोरोनाले कुनै पेशा, व्यावसाय, धर्म, जात, लिंग र समुदायका व्यक्तिलाई नचिन्ने भएकोले यसको कुनै वादको आधारमा राजनीति गर्न नहुने बताए ।

उनले वीरगन्जलाई सुरक्षित राख्नका लागि लगातार परीक्षणको आवश्यक रहेको र त्यसका लागि वीरगन्जमा पीसीआर मेशिनको आवश्यकता रहेको बताए । वीरगन्ज उद्योग वाणिज्य संघका अध्यक्ष गोपाल केडियाले कोरोना संक्रमणपछि लकडाउनदेखि नै वीरगन्ज महानगरपालिकाको साथमा रहेकोले अझै आगामी दिनमा पनि आवश्यक सहयोग र सहकार्य निरन्तर रहने बताए ।

बैंकर्स एशोसिएसनका रोशनभक्त श्रेष्ठले वीरगन्जमा कोरोना नियन्त्रणका लागि महानगरपालिकाले पीसीआर मेशिन खरिदका लागि साथ र सहयोग रहने बताए ।

नेपाल पत्रकार महासंघका पूर्व मध्यमाञ्चल संयोजक महेश दासले वीरगन्ज महानगरपालिकाले स्थानीय सरकारको हैसियतले गरेको काम सराहनीय रहेको बताउदै यो पीडाको अवस्थामा प्रदेश सरकार, संघ सरकारले वीरगन्जमा कोरोना विशेष अस्पताल र व्यावस्थापनमा सहयोग नगरे नागरिक समाज अगाडि आउनुपर्ने आवश्यकता रहेको बताए ।

वीरगन्ज महानगरपालिकाका मेयर विजय सरावगीको अध्यक्षतामा भएको भेलाले महानगरपालिकाको अभियानमा साथ दिनका लागि विभिन्न पेशा, क्षेत्र, र व्यावसायमा संलग्न नागरिक समाजको समिति गठन गरेको छ ।

प्राध्यापक डाक्टर दीपक शाक्यको संयोजकत्वमा सात सदस्यीय समिति गठन गरिएको छ । समितिको सदस्यहरुमा नेपाल बार एशोसिएसनका शालिकराम प्रसाद, वीरगन्ज उद्योग वाणिज्य संघका अध्यक्ष गोपाल केडिया, बैकर्स एशोसिएसनका रोशनभक्त श्रेष्ठ, सामाजिक संस्थाबाट इब्राहिम देवान, नेपाल पत्रकार महासंघका उपाध्यक्ष अनुप तिवारी र कमल मोहन पोखरेल रहेका छन् ।