आचार्यले सम्हाले मधेशको कमाण्ड,शान्ति सुरक्षामा चुनौती बन्ने अपराधका हरेक संजाललाई ध्वस्त पार्ने उद्धघोष

इसीमाना सम्बाददाता २०८१ असोज २ गते १७: ३६ मा प्रकाशित 275 पटक पढिएको

वीरगञ्ज। मधेश प्रदेशका नयाँ प्रहरी उपरीक्षक (डिआईजी) लालमणि आचार्यले मधेश प्रदेश प्रहरीको कमाण्ड सम्हाल्ने बित्तिकै तोकिएको जिम्मेवारी पुरा गर्न मातहतलाई निर्देशन दिएका छन ।

कार्यभार सम्हालेको दोश्रो दिन उनले भर्चुअल बैठक मार्फत आठै जिल्लाका प्रहरी प्रमुख र ट्राफिक प्रहरी प्रमुखलाई यस्तो निर्देशन दिएका हुन । उनले ट्राफिक चेकजाँचका नाममा नागरिकलाई दुःख नदिन समेत निर्देशन दिएका छन ।

ट्राफिक प्रहरी राजस्व संकलन तर्फ बढी केन्द्रीत भएको भन्दै आलोचना हुदै आएको छ । मधेश प्रदेशमा जंगलमा एकान्त ठाउँमा चेक जाँचका क्रममा नागरिकलाई सास्ती दिने गरेको गुनासो प्रदेश सरकारमा समेत पुगेको बेलामा मधेशका प्रहरी प्रमुखको निर्देशनले ट्राफिक प्रहरीको कार्यशैलीमा सुधारको अपेक्षा बढेको छ ।

डिआइजी आचार्यले सीमापारिबाट हुने अवैध ब्यापारको रोक्न पनि निर्देशन दिएका छन । उनले राजस्व छलीको एउटा कारण अबैध कारोवार भएकोले त्यसलाई रोक्न पनि निर्देशन दिएका हुन ।

मधेशका जिल्लाहरु भारतीय सीमासंग जोडिएको र खुला सीमा भएका कारण राजस्व छलेर सामान आयात गर्ने गुनासो सदैैब नै छ । उनले माथिल्लो तहका प्रहरी अधिकृतलाई पेशा प्रति निष्ठा प्रर्दशन गर्न भनेका छन ।

उनले नेपाल प्रहरीको इमान्दार प्रयत्नका बारेमा नागरिकले बिश्वास गर्ने गरि कार्य सम्पादनमा ध्यान दिन प्रहरी अधिकारीहरुलाई भनेका छन ।

यस अघि धनुषाको प्रहरी प्रमुख भएर कार्य सम्पादन गरिसकेका डिआइजी आचार्यलाई मधेशको सुरक्षा त्यसका चुनौतीका बारेमा निकै राम्रो ज्ञान छ ।

नागरिकको जीउधनको रक्षा प्रहरीको प्रमुख प्रथामिकता भएको बताउदै डीआईजी आचार्यले शान्ति सुरक्षामा चुनौती बन्ने अपराधका हरेक संजाललाई ध्वस्त पार्नु पर्नेै बताएका छन ।

उनले पेशागत चरित्र र निष्ठको बर्खिलाफ हुने गरि कोही प्रस्तुत भएका संगठन भित्रका त्यस्ता ब्यक्ति कारवाहीको भागीदार बन्नु पर्ने उनले चेतावनी दिएका छन ।