भलोको जमाना रहेन,जेलमुक्त गराउन धन धर्म खर्चेका वडाध्यक्षलाई आफनै साथीले हत्या गरेको खुलासा

इसीमाना सम्वाददाता २०८१ असोज १० गते ०२: ४४ मा प्रकाशित 181 पटक पढिएको

स्व.वडाध्यक्ष मुकेश यादव

बर्दीबास । महोत्तरीको रामगोपालपुरका वडा अध्यक्ष मुकेश यादवको हत्यामा संलग्न भएको आरोपमा प्रहरीले दुई जनालाई पक्राउ गरेको छ ।

महोत्तरी प्रहरीले औरही नगरपालिका –७ स्थित भोइल टिमकियाका सञ्जीव झा र दिलीप मण्डललाई पक्राउ गरेको हो ।

पक्राउ परेका मध्य संजीव झा मानव बेचबिखन मुद्धामा थुनमा थिए । वडाध्यक्ष यादवले झा लाई जेलबाट मुक्त गराउन १६ लाख खर्चेका थिए ।

झा र यादव साथी हुन । मिल्ने साथी भएकोले यादवले झालाई निकाल्न ठुलो मेहनत गरेका थिए । झा जेलमुक्त भएपछि यादवले आफूले लगाएको पैसा माग्न थालेका थिए ।

पैसा दिन नपरोस भनेर झाले यादवको हत्या गरेको हुन सक्ने कोणबाट प्रहरीले अनुसन्धान शुरु गरेको छ ।

जिल्लाको बर्दिबासबाट रामगोपालपुरतर्फ मोटरसाइकलबाट जाने क्रममा ९ भदौँमा रामगोपालपुर नगरपालिका–२ का वडाअध्यक्ष मुकेश यादवको रहस्यमय अवस्थामा शव फेला परेको थियो ।

वडाअध्यक्ष यादवको रहस्यमय मृत्युमा संलग्न दुई जनालाई पक्राउ गरी कर्तव्य ज्यान मुद्दा दर्ता गरी अनुसन्धान अघि बढाइएको जिल्ला प्रहरी कार्यालयका प्रहरी नायब उपरीक्षक सन्तु लाल प्रसाद जैसवारले जानकारी दिए ।

पक्राउ परेका दुवै जनालाई थप अनुसन्धानका लागि कर्तव्य ज्यान मुद्दामा म्याद थप गर्न महोत्तरी जिल्ला अदालतमा पेश गरिएको छ ।

वडाअध्यक्ष यादवको हत्या वा दुर्घटनामा मृत्यु भन्ने विषयमा जिल्लामा सरोकारवालाबीच मत विभाजित छ । जिल्लाका वडाअध्यक्षहरूले यादवको हत्या भएको दाबी गर्दै कारबाहीका लागि माग गर्दै आएका छन् । वडाअध्यक्ष यादवको मृत्युबारे सीआइबीले समेत अनुसन्धान गरिरहेको छ ।