परवानीपुरमा सडक बिस्तारमा अवरोधको अभ्यास, प्रजिअलाई बुझाइयो ज्ञापन

इसीमाना सम्वाददाता २०८२ जेठ ३ गते १२: ५६ मा प्रकाशित 114 पटक पढिएको

वीरगंज । वीरगञ्जको परवानीपुर चोकदेखि पश्चिम पटेलनगरसम्म सडक विस्तारको कामलाई लिएर महानगरपालिका वडा नम्बर २१ मा विवाद उत्पन्न भएको छ ।

महानगरपालिकाले सडक चौडा गर्ने कार्य सुरु गरेपछि स्थानीयले विरोध जनाउँदै जिल्ला प्रशासन कार्यालय पर्सामा ज्ञापनपत्र बुझाएका छन् ।

सडक चौडा गर्दा पुरानो सडकबाट नपुग भएमा दुवैतर्फबाट बराबर जग्गा लिनुपर्नेमा त्यसो नगरी एकतर्फीरुपमा उत्तरतर्फका स्थानीयको जग्गामा मात्रै क्षति पुर्‍याएको अस्थानीयको आरोप छ ।

स्थानीयले महानगरपालिकाका प्रमुख राजेशमान सिंह र वडा नम्बर २१ का वडा अध्यक्ष राधा कृष्ण साह रौनियारले कुनै जानकारी र सूचनाबिना नगर प्रहरी र डोजर लिएर आई बलजफ्ती घर भत्काउन थालेको आरोप लगाएका छन् ।

विरोध गर्न गएका स्थानीयलाई नगर प्रहरीले पक्राउ गरी जिल्ला प्रहरी कार्यालयमा समेत थुनेको छ । स्थानीयले न्यूनतम मापदण्ड अनुसार सडक विस्तार गर्दा दुवैतर्फबाट सहमतिमा जग्गा लिएर काम गर्नुपर्ने माग गरेका छन् ।

एकतर्फी दबाब र प्रभावमा परी गरिएको सडक विस्तारको काम न्यायोचित नभएको उनीहरुको ठहर छ । ज्ञापनपत्रमा ,माग सुनुवाई नभएमा उत्पन्न हुने परिस्थितिको जिम्मेवार स्वयं महानगरपालिका प्रमुख र वडा अध्यक्ष हुने चेतावनी दिइएको छ ।

स्थानीयले तत्काल नापजाँच र सहमतिबिना भइरहेको सडक निर्माण कार्य रोक्न माग गरेका छन् । वीरगन्ज महानगरपालिका वडा नम्बर २१ मा सडक विस्तारका लागि वर्षादेखिको अतिक्रमण हटाइएको छ । परवानीपुर चोकदेखि पश्चिम पटेलनगरसम्मको सडकको अतिक्रमण शुक्रबार हटाइएको हो ।

उक्त सडकको विस्तार र स्तरोन्नत्तीका लागि पप्पु स्वच्छन्द ज्वाइन्ट भेन्चरले ठेक्का सकारेर काम सुरु गरेका थिए । तर केही व्याक्तिले सडकमा गरेको अतिक्रमण नहटाएका कारण उक्त सडकको विस्तार कार्य बीचमै रोकिएको थियो ।

तपाईं हामीसंग फेसबुक र ट्वीटर मार्फत् पनि जोडिन सक्नुहुन्छ ।