तस्विरः एआईले बनाएको सांकेतीक तस्विर हो

वीरगंज । हवाइ इन्धन चोरी गरेको आरोपमा पक्राउ परेका ७ जनामध्ये ६ जनालाई पर्सा जिल्ला अदालतले धरौटीमा रिहा गर्न आदेश दिएको छ ।

भदौ २१ गते पक्राउ परेका ७ जनामध्ये ६ जनाको मंगलबार अबेरसम्म थुनछेक बहस भएपछि अदालतले उनीहरूलाई धरौटीमा रिहा गर्न आदेश दिएको हो ।

पर्सा जिल्ला अदालतका श्रेस्तेदार प्रभाकर मल्लिकका अनुसार उमेश राना मगर र मन्द सिंह लामासँग जनही ४५ हजार रुपैयाँ तथा असलम हवारी, रफिक मियाँ, सन्देश राना मगर र केशर राना सुनारसँग जनही २५ हजार रुपैयाँ धरौटी माग गरिएको छ ।

अदालतले ६ जनालाई धरौटीमा रिहा गर्न आदेश दिए पनि पेट्रोल पम्प सञ्चालक तथा घटनाका मुख्य आरोपित भनिएका सुनैन मियाँको हकमा भने मंगलबार कुनै आदेश भएको छैन । उनी अदालतमा हाजिर नभएकाले उनको थुनछेक बहस हुन बाँकी रहेको अदालत स्रोतले जनाएको छ ।

को हुन सुनैन मिया र भएको के थियो ?

वीरगंज महानगरपालिका  वडा नं ३ निवासी मिया वीरगन्ज महानगरपालिका १४, बाइपास सडकस्थित सौदागर आयल सेन्टरका सञ्चालक हुन्उ । यद्धपी आयल सेन्टर भने उनको छोराको नाममा दर्ता रहेको छ ।

  
भारतको बिहारस्थित इन्डियन आयल कर्पोरेसनको बरौनी टर्मिनलबाट नेपाल आयल निगमको हवाई इन्धन डिपो सिनामंगल, काठमाडौंका लागि आउँदै गरेको २० हजार लिटर क्षमताको ना ७ ख १५३९ नम्बरको ट्यांकरबाट वीरगन्जमै इन्धन चोरी भएको थियो। 

प्रहरीका अनुसार उक्त आयल सेन्टरमै ट्यांकरको सिल तोडेर चोरी भइरहेको थियो। प्रहरीले फलामको पाइपको हुक प्रयोग गरी सिल माथि सारेर ग्यालिनमा इन्धन भर्दै गरेको अवस्थामा पक्राउ गरेको थियो। 

पक्राउ पर्ने ७ जनामा पम्प सञ्चालक सुनैन मियाँ, कर्मचारी असलम हवारी, रफिक मियाँ लगायत थिए। 
प्रहरी अनुसन्धानले उनलाई मुख्य आरोपीका रूपमा राखेर मुद्दा बुझाएको थियो। 

त्यसपछि के भयो?

यसअघि भदौ २ गते अदालतले मियाँ बिरामी रहेको भन्दै पाँच दिनभित्र अनुसन्धान पूरा गरी मुद्दा बुझाउन प्रहरीलाई आदेश दिएको थियो ।

अनुसन्धान नसकिए उनलाई बाहिर राखेर अनुसन्धान गर्नसमेत अदालतले आदेश दिएको थियो । सोही आदेशपछि मियाँ रिहा भएका थिए । 

प्रहरीले अनुसन्धान पूरा गरी अदालतमा मुद्दा बुझाइसकेको अवस्थामा समेत मियाँ अदालतमा हाजिर नभएको जनाइएको छ । उनको हकमा अदालतमा हाजिर भएपछि मात्रै थुनछेक बहस हुने बताइएको छ ।

साउन २१ गते पक्राउ परेपछि अदालतले म्याद थप दिँदै थियो। भदौ २ गते उनका वकिलले मधुमेह, मुटु, आँखा लगायत स्वास्थ्य समस्या र दैनिक १८ ट्याब्लेट खानुपर्ने भन्दै हिरासत बाहिर राखेर अनुसन्धान गर्न माग गरे। 

अदालतले मुलुकी फौजदारी कार्यविधि संहिता दफा १५ अनुसार ५ दिनभित्र अभियोगपत्र बुझाउने वा नसके हाजिर जमानीमा छाड्ने आदेश दियो, जसअनुसार भदौ ७ गते उनी रिहा भए र उपचारका लागि काठमाडौंको अन्नपूर्ण न्यूरो हस्पिटल गएको प्रहरीले जनाएको थियो। 

यो रिहाइमा “सेटिङ”भएको आशंका उठेपछि प्रहरी र सरकारी वकिलले अदालतकै आदेश भएको स्पष्ट पारेका थिए।