वीरगञ्ज । नेपाल यातायात व्यवसायी राष्ट्रिय महासंघको पर्सा जिल्ला कमिटीको अधिवेशन सम्पन्न भएको छ।
अधिवेशनबाट विनोदकुमार मानन्धर सर्वसम्मत रूपमा अध्यक्ष र सुमनकुमार श्रेष्ठ सचिव पदमा निर्वाचित भएका छन्।
महासंघ स्रोतका अनुसार, अधिवेशनले जिल्लाको यातायात क्षेत्रलाई व्यवस्थित, सुरक्षित र व्यवसायीमैत्री बनाउने उद्देश्यसहित नयाँ नेतृत्व चयन गरेको हो।
लामो समयदेखि यातायात व्यवसायमा सक्रिय मानन्धर र श्रेष्ठको अनुभव, संगठनप्रतिको प्रतिबद्धता तथा सहकार्यको भूमिकालाई मूल्यांकन गर्दै प्रतिनिधिहरूले सर्वसम्मत निर्णय गरेको बताइएको छ।
नव–निर्वाचित अध्यक्ष मानन्धरले पर्सा जिल्लाका यातायात व्यवसायीका हक–हित संरक्षण, नीतिगत सुधार र सरकारी निकायसँग सहकार्यलाई प्राथमिकतामा राख्ने प्रतिबद्धता व्यक्त गरेका छन्।
त्यस्तै, सचिव श्रेष्ठले संगठनलाई अझ सुदृढ, पारदर्शी र क्रियाशील बनाउने दिशामा काम गर्ने बताएका छन्।
नयाँ कार्यसमितिलाई विभिन्न यातायात व्यवसायी, सरोकारवाला निकाय तथा शुभेच्छुकहरूले बधाई तथा सफल कार्यकालको शुभकामना व्यक्त गरेका छन्।
तपाईको प्रतिक्रिया