वीरगन्ज। पर्सा प्रहरीले ठूलो परिमाणको लागुऔषध चरेससहित पक्राउ परेका दुई जनालाई आज सार्वजनिक गरेको छ।
जिल्ला प्रहरी कार्यालय पर्साले दिउँसो आयोजना गरेको पत्रकार सम्मेलनमार्फत पक्राउ परेकाहरू र बरामद सामग्री सार्वजनिक गरेको हो।
प्रहरीका अनुसार विशेष सूचनाका आधारमा गरिएको कारबाहीका क्रममा २४० किलो चरेससहित दुई जना लागुऔषध कारोबारी पक्राउ परेका हुन्।
उनीहरू वीरगन्ज महानगरपालिका क्षेत्र हुँदै जगरनाथपुरबाट चरेस ओसारपसार गरिरहेको अवस्थामा नियन्त्रणमा लिइएका थिए।
पक्राउ पर्नेमा मकवानपुरको थाहा नगरपालिका–१९ निवासी सरोज मोक्तान र सोही स्थानका नवराज लो रहेको पर्सा प्रहरी प्रमुख एसपी सुदिपराज पाठकले जानकारी दिए।
उनीहरूको साथबाट ना ३ ख ५०९३ नम्बरको ६ चक्के ट्रकसमेत बरामद गरिएको छ।
एसपी पाठकका अनुसार बरामद चरेस कहाँबाट ल्याइएको र कहाँ पुर्याउन लागिएको थियो भन्ने विषयमा थप अनुसन्धान भइरहेको छ। घटनामा अन्य व्यक्तिको संलग्नता भएरनभएको विषयमा पनि अनुसन्धानलाई तीव्र बनाइएको प्रहरीले जनाएको छ।
पक्राउ परेकाहरूमाथि लागुऔषध सम्बन्धी कसुरमा आवश्यक कानुनी प्रक्रिया अघि बढाइएको जिल्ला प्रहरी कार्यालय पर्साले जनाएको छ।
तपाईको प्रतिक्रिया