हत्यारा सांसद यादव पक्राउ

इसीमाना सम्वाददाता २०८० भदौ १८ गते ०८: ५० मा प्रकाशित 466 पटक पढिएको

जनकपुरधाम । मधेश प्रदेशका स्वतन्त्र सांसद अनिरुद्धसिंह यादवलाई प्रहरीले पक्राउ गरेको छ । उनलाई माओवादी नेताको हत्यामा दोषी ठहर भएकाले प्रहरीले पक्राउ गरेको हो । सर्वोच्च अदालतको फैसलाको पूर्ण पाठ आएपछि प्रहरीले उनलाई पक्राउ गरेको हो ।

सप्तरीको प्रदेश क्षेत्र नम्बर ४ ‘ख’ बाट निर्वाचित सांसद यादवलाई प्रहरीले राजविराजबाट पक्राउ गरिएको जनाएको छ । जिल्ला, उच्च र सर्वोच्च तीनै तहका अदालतले दोषी ठहर गरिसकेका सांसद यादवलाई पक्राउ गरिएको जिल्ला प्रहरी कार्यालय सप्तरीका एसपी नरेन्द्र कार्कीले जानकारी दिएका छन् ।

उनका अनुसार माओवादी नेता गोबिन्द चौधरीको हत्या मुद्दामा दोषी ठहर भएका सांसद यादवलाई पक्राउ गरिएको हो ।

सर्वोच्च अदालतका न्यायाधीश प्रकाशमान सिंह राउत र बमकुमार श्रेष्ठ संयुक्त इजलासले २०७८ पुस १३ गते यसअघि जिल्ला तथा उच्च अदालतले गरेको निर्णयलाई नै सदर गर्ने आदेश दिएको देखिन्छ ।

आरोपित यादवको निर्देशनमा साबिकको बोदे बर्साइन गाविस –४ बाट वि.स. २०६४ असार ९ गते सप्तरी खोक्सरप्रवाह –१ का ३२ वर्षीय दिपु भन्ने गोविन्द चौधरीलाई नियन्त्रणमा लिई नेङ्गडा गाविस –५ वैरिया टोलमा पुगाई पीडितलाई पाँच वटा गोली हानी हत्या गरेको अभियोग पत्रमा उल्लेख छ ।

सांसद यादवलाई पक्राउ गरी अदालतमा बुझाएको सप्तरीका प्रहरी प्रमुख एसपी नरेन्द्र कार्कीले बताए । उनलाई प्रहरीले राजविराजस्थित जिल्ला अदालतमा हाजिर गराएको छ ।