नेशनल मेडिकल कलेजमा छापा प्रवन्ध निर्देशक डा. शाहनवाज अन्सारी गिरफ्तार

इसीमाना सम्वाददाता २०८० चैत २५ गते १५: ५० मा प्रकाशित 1673 पटक पढिएको

बीरगंज । नेशनल मेडिकल कलेजका बीरगंजका प्रवन्ध निर्देशक डा.शाहनवाज अन्सारीलाई प्रहरीले गिरफ्तार गरेको छ । शिक्षण अस्पतालको प्रयोगशालामा म्याद गुज्रिएको रसायन ( केमीकल) को प्रयोग भएको पाइएपछि प्रहरीले अन्सारीलाई गिरफ्तार गरेको हो ।

डा. अन्सारी कलेजका अध्यक्ष प्रा.डा.जैनुदिन अन्सारीका छोरा हुन । प्रहरीले प्रयोगशालामा कार्यरत प्राविधिक संजय साहलाई समेत गिरफ्तार गरेको छ ।

नेशनल मेडिकल कलेजको प्रयोगशालामा म्याद गुज्रिएको औषधीको प्रयोग हुने सूचना पाएपछि राज्यका बिभिन्न निकायको संयुक्त सहभागितामा कलेजको प्रयोगशालामा छापामारी भएको हो ।

बीरगंज महानगरपालिका, जिल्ला प्रहरी कार्यालय, बाणिज्य कार्याल, औषधी ब्यवस्था बिभाग, बीरगंज उधोगबाणिज्य संघ ,होटेल तथा पर्यटन ब्यवसायी संघ लगायत बिभिन्न निकायका प्रतिनिधिहरुको सहभागितामा छापामारी भएको हो ।

प्रयोगशालामा प्रयोग हुने ३३ किसीमको औषधी म्याद गुज्रिएको फेला परेको छ । ल्याबमा सन २०२१ मै म्याद सकिसकेको केमिकलसहितका औषधी बरामद भएको छ ।

प्रहरीका अनुसार धेरै परिमाणमा ल्याबबाट म्याद नाघेको (डेट एक्सपायर) केमिकल तथा औषधीहरु बरामद भएको छ । बरामद सबै केमकिलबारे अनुसन्धानका लागि बाँकी प्रक्रिया अगाडि बढाइएको अनुगमन टोलीले जनायो ।