वीरगन्ज। नेपाली कांग्रेसका सभापति गगनकुमार थापाले सोमबार वीरगन्जमा धार्मिक, सामाजिक तथा बौद्धिक गतिविधिमा सहभागिता जनाएका छन्।
छठ पर्वको अवसरमा वीरगन्ज आएका थापाले घडिअर्वा पोखरीमा रहेको छठघाटमा पूजाआजा गर्नुका साथै प्रदीप गिरी फेलोसिप उद्घाटन गरेका छन।

थापा सोमबार बिहान पत्नी अञ्जना केसीसहित वीरगन्ज महानगरपालिका–१० स्थित घडिअर्वा पोखरी छठघाट पुगेका थिए।
त्यहाँ उनले छठ पर्व मनाइरहेका व्रतालु महिलाहरूसँग भेटघाट गर्दै टीका तथा आशीर्वाद ग्रहण गरे। उनले घडिअर्वास्थित सूर्य मन्दिरमा समेत पूजाआजा गरेका थिए।
मधेशको सांस्कृतिक पहिचान र आस्थासँग जोडिएको छठ पर्वमा सहभागी हुँदै थापाले धार्मिक सद्भाव र सामाजिक एकताको सन्देश दिएका छन्।
धार्मिक कार्यक्रममा सहभागितापछि थापा वीरगन्ज महानगरपालिका–१४ पिपरामा आयोजित स्वर्गीय प्रदीप गिरी फेलोसिप उद्घाटन कार्यक्रममा सहभागी भए।
प्रदीप गिरी इन्स्टिच्युटद्वारा आयोजित कार्यक्रममा उनले संघीयता र समावेशिताले नेपालको लोकतन्त्रलाई थप बलियो बनाएको धारणा राखेका थिए।
फेलोसिप कार्यक्रममार्फत विचार, अनुसन्धान, लेखन तथा कानुनी सेवाका क्षेत्रमा नयाँ पुस्तालाई अवसर प्रदान गर्ने लक्ष्य राखिएको छ।
कार्यक्रमअन्तर्गत अनुसन्धान तथा लेखन फेलोसिप, कानुन व्यवसायीका लागि न्याय फेलोसिप र आफ्नै राजनीतिक दल वा संस्थाका कमजोरीमाथि आलोचनात्मक लेखन गर्ने उत्कृष्ट निबन्धलाई पुरस्कृत गर्ने व्यवस्था गरिएको छ।
विशेषगरी दलित, मधेसी, आदिवासी जनजाति, महिला तथा काठमाडौं उपत्यकाबाहिरका आवेदकलाई प्राथमिकता दिने कार्यक्रमको उद्देश्य रहेको आयोजकले जनाएको छ।
फेलोसिपअन्तर्गत चार जना कानुन व्यवसायीलाई एक वर्षका लागि न्याय फेलोका रूपमा छनोट गरी मधेश र काठमाडौंमा कानुनी सहायता डेस्क सञ्चालन गर्ने योजना पनि समेटिएको छ।
तपाईको प्रतिक्रिया