वीरगन्ज, २५ मंसिर । पर्साको प्रतिनिधिसभा निर्वाचनको चारवटै क्षेत्र संघीय समाजवादी फोरम र राजपा गठबन्धनले जितेको छ ।

प्रतिनिधिसभाको चार र प्रदेशसभाको ८ वटा क्षेत्र रहेको पर्सा क्षेत्र नम्बर– १, २ र ३ मा संघीय समाजवादी फोरम नेपालका उम्मेदवार र ४ मा राजपा नेपालका उम्मेदवार विजयी भएका हुन् ।

२०६४ भन्दा अघिको निर्वाचनमा कांग्रेस पकड रहेको पर्सामा ०६४ को संविधानसभा निर्वाचनमा १ मा मधेसी जनअधिकार फोरमकी करिमा वेगमले जितेकी थिइन् । २०७० सालको दोश्रो संविधानसभाको निर्वाचनमा १ र ३ मा कांग्रेस र २, ४, ५ नम्बर क्षेत्रमा एमालेले कब्जा गरेको थियो ।

चारवटा निर्वाचन क्षेत्र बनाईएको पर्सामा यसपटक चारवटै क्षेत्र फोरम राजपाले हत्याएको छ । पर्सा क्षेत्र नं १, २ र ३ मा फोरम नेपाल र पर्सा क्षेत्र नं ४ मा राजपा नेपालका उम्मेदवार विजयी भएका छन् ।

क्षेत्र नम्बर १ मा फोरम नेपाल राजपा गठबन्धनका उम्मेदवार एंव फोरम नेपाल पर्साका अध्यक्ष प्रदिप यादव २१ हजार १ सय ३२ मत प्राप्त गरि बिजयी भएका छन् । उनले आफना निकटतम प्रतिद्वन्द्वी कांग्रेसका अनिल रुंगटालाई ४ हजार ६ सय ५१ मत अन्तरले पराजित गरेका हुन् । रुंगटाले १६ हजार ४ सय ८१ मत प्राप्त गरेका छन् ।

यसैगरि तेस्रो स्थानमा रहेका बाम गठबन्धनका उम्मेदवार एमालेका बिचारी यादवले ५ हजार ४ सय ८१ मत मात्र ल्याएकका छन् । त्यस्तै क्षेत्र नम्बर–२ मा फोरम नेपालका विमल श्रीवास्तव विजयी भएका छन् ।

उनी निकटतम प्रतिद्वन्द्वी अजय चौरसिया भन्दा १ हजार ४ सय ६५ मत बढी ल्याएर विजयी भएका हुन् । फोरम नेपालका श्रीवास्तवले २० हजार १ सय ६९ मत ल्याएका छन् । उनका प्रतिस्पर्धी नेपाली काँग्रेसका अजय कुमार चौरसियाले १९ हजार सातसय ४ मत प्राप्त गरे ।

यसअघि उनी राष्ट्रिय प्रजातन्त्र पार्टी र स्वतन्त्रबाट गरि चार पटकसम्म वीरगञ्जको मेयर भईसकेका छन् । स्थानीय तहको निर्वाचनमा राजपाबाट मेयरको टिकट नपाएपछि विजय गच्छादारको लोकतान्त्रिक फोरमबाट मेयरमा लडेका थिए ।

उनी अहिले आफैले जितेको पार्टी संघीय समाजवादी फोरम नेपालका विजय सरावगीसँग मेयरमा पराजित भएका थिए । पर्सा क्षेत्र नं ३ बाट प्रतिनिधि सभा सदस्यमा फोरम नेपालकै हरि नारायण रौनियार विजयी भएका छन् ।


उनले निकटतम प्रतिद्वन्दी भन्दा १ हजार ३ सय ६५ मत बढी ल्याएका छन् । रौनियारले १५ हजार १ सय ६६ मत प्राप्त गर्दा निकतम प्रतिद्वन्दी नेपाली कांग्रेसका निवर्तमान संसद समेत रहेका सुरेन्द्र चौधरीले १३ हजार ८ सय १ मत ल्याए ।

त्यस्तै निवर्तमान सांसद नै रहेका उम्मेदवार नेकपा एमालेका नेता राजकुमार गुप्ताले १० हजार नौसय ८६ मत पाए । नेपालको क वर्गको निर्माण व्यवसायी रौनियार दुईजना निवर्तमान संसदलाई पराजित गर्दै प्रतिनिधिसभा क्षेत्र नम्बर ३ बाट विजयी भएका हुन् ।

पर्साको क्षेत्र नम्बर–४ प्रतिनिधिसभा तर्फ राजपा नेपालका लक्ष्मणलाल कर्ण विजयी भएका छन् । कर्णले निकटम प्रतिद्वन्दी नेपाली काँग्रेसका प्रभावशाली नेता उम्मेदवार रमेश रिजाल भन्दा ६ हजार ३६ मत बढी ल्याएर विजयी भएका हुन् ।

नेता कर्णले २० हजार ७ सय ३८ मत ल्याँउदा नेपाली नेपाली कांग्रेसका अनुशासन समितिका संयोजक समेत रहेका रिजालले १४ हजार ७ सय मत ल्याए । क्षेत्र नम्बर ४ मा बामगठबन्धनको तर्फबाट माओवादी केन्द्रकी नेतृ उर्मिला अर्यालले ९ हजार ६ सय १७ मत पाइन् ।

पूर्वमन्त्री समेत रहेकी माओवादी नेतृ अर्याललाई आफ्नै पार्टीका कार्यकर्ताले सहयोग नगर्दा पराजित भएकी हुन् । त्यस्तै प्रदेशसभा निर्वाचनमा फोरम राजपा र नेपाली कांग्रेसले जितेको छ । प्रदेशसभामा पनि दुईवटा क्षेत्र नेपाली कांग्रेसले जितेको छ ।

क्षेत्र नम्बर ३ को प्रदेशसभा ख मा पनि फोरम राजपा गठबन्धनका उम्मेदवार प्रल्हाद गिरी विजयी भएका छन्  । गिरीले ९५ मतले नेपाली कांग्रेसका जनार्दन सिंह क्षेत्रलाई पराजित गरेका हुन् । गिरीको ६३४५ र क्षेत्रीको ६२५० मत आएको छ ।