वीरगञ्ज । वीरगञ्ज महानगरपालिकाले पिपरा लिङ्क रोडलाई महात्मा गान्धी (एमजी) पथ नामाकरण गर्ने कार्यक्रम स्थगित गरेको छ । यस अघि बिहिवार सडकको नामाकरणको कार्यक्रम तय गरिएको थियो ।
बिहिबार हुने समारोहमा मधेस प्रदेशका मुख्यमन्त्री सरोज कुमार यादव र नेपालका लागि भारतीय राजदूत नवीन श्रीवास्तवबाट संयुक्त रुपमा नामाकरण शिलान्यास अनावरण गराउने तय गरिएको थियो । तर बुधबार महानगनगरले एक सूचना जारी गर्दै सडक नामाकरण अनावरण समारोह हालका लागि स्थगीत गरिएको जनाएको छ ।

प्रमुख प्रशासकीय अधिकृत पौडेलले जारी गरेको सूचनामा महानगर भित्रको ऐतिहासिक पिपरा स्थित वीरगंज चीनीमिलको आवास क्षेत्रमा रहेको पशुपतिनाथ मन्दिर, पिपरा मठ र लक्ष्मणवा पार्कको सौन्दर्यकरण तथा संरक्षण गर्ने योजना अगाडि बढिरहेको सन्दर्भमा यस बारे अनेकथरीका दुष्प्रचार गर्ने प्रयास गरिएकोमा महानगरको गम्भिर ध्यानाकर्षण भएको उल्लेख छ ।

वीरगंज महानगरका मेयर राजेशमान सिंहले सडक अनावरण कार्यक्रमलाई दुष्प्रचार गरेर विवादीत बनाउन खोजिएपछि भारतीय राजदूत जस्तो व्याक्तित्वलाई बोलाएर विवादीत बनाउन उपयुक्त नदेखिएकाले हालका लागि उक्त कार्यक्रम स्थगीत मात्र गरिएको बताए ।

गान्धीको नामाकरण राख्ने विषयमा स्थानीय स्तरमा विरोध भएपछि भारतीय राजदुत नआउने भएकोले कार्यक्रम स्थगित गरिएको हो । महानगरले अगाडि सारेको योजनाबारे अनभिज्ञ युवाहरुले पिप्राको ऐतिहासिक महत्व धरापमा पर्ने भन्दै नामाकरणको बिरोध गरेका थिए ।

पिपराको ऐतिहासिक र धार्मिक महत्वलाई समाप्त पार्ने उदेश्यले महात्मा गान्धीको नाउँबाट नामाकरण गर्न खोजिएको भन्दै स्थानीय युवाहरुले सडकमा आएर विरोध प्रर्दशन गरेका थिए । बिभिन्न क्षेत्रका सामाजिक अगुवाले समेत नामाकरणको बिरोध गरेपछि महानगरले हाललाई कार्यक्रम थागीत गरेको जनाएको हो ।

नेकपा एमालेका केन्द्रीय सदस्य अरविन्द सिंहले सामाजिक सञ्जाल फेसबुकमा वीरगन्ज पिपराको आफ्नै ऐतिहासिक, सांस्कृतिक र मौलिक पहिचानलाई नै संकटमा पार्ने गरि पिपरा लिंक रोडको नाम महात्मा गान्धी रोडको नाममा नामाकरण गर्ने षड्यन्त्रको अगुवाइ वीरगन्ज महानगरपालिकाले गर्नु खेदजनक र निन्दनीय भएको उल्लेख गरेका छन ।

उनले महात्मा गान्धी शान्तिपूर्ण अहिंसात्मक आन्दोलनका पर्याय हुन् भन्ने कुरामा कहिँ कसैको विमति नहोला तर दक्षिणी छिमेकीको चाकरी, दलाली गरेर २–४ करोडको विकास निर्माणका प्रोजेक्ट पाइहाल्ने लोभले पिपराको ऐतिहासिक र सांस्कृतिक पहिचान मेटाउने कुरामा सहमत हुन सकिदैन भनेका छन ।

पर्सामा क्रियाशिल सम्पूर्ण राजनीतिकदलहरुले समेत वीरगञ्जको पहिचान मेटाउनेगरी स्थानीय सरकारबाट हुने जुनसुकै हरकतको कडा प्रतिवाद गर्ने जनाएका छन । प्रमुख जिल्ला अधिकारीको कार्यकक्षमा भएको सर्वदलिय बैठकमा नेकपा एमाले, नेपाली कांग्रेस, नेकपा माओवादी केन्द्र, नेकपा एकिकृत समाजवादी, जसपा, लोसपा, जनमत लगायतका राजनीतिक दलहरुले समेत वीरगञ्ज महानगरपालिकाको कदमको विरोध जनाएको नेकपा (एस)पर्साका अध्यक्ष बालगोपाल थापाले बताए ।