सिमरा । जीतपुरसिमरा नगर उद्योग वाणिज्य संघको नेतृत्व चयनका लागि असार ७ गते हुन लागेको निर्वाचनमा ३० जनाले उम्मेदवारी दर्ता गराएका छन् ।

निर्वाचन समितिका अनुसार बुधबार विभिन्न २१ पदका लागि ३० जनाको उम्मेदवारी परेको हो ।

संघको अध्यक्ष पदका लागि निवर्तमान कार्यसमितिका वरिष्ठ उपाध्यक्ष मनोजकुमार गुप्ता र वाणिज्य उपाध्यक्ष गजेन्द्रकुमार गुप्ताले उम्मेदवारी दिएका छन् ।

यसैगरी वरिष्ठ उपाध्यक्ष पदमा शिवजीप्रसाद साह सोनार र सन्तोष कुशवाहाको उम्मेदवारी परेको छ । उपाध्यक्ष उद्योगतर्फ विजयकुमार साहको एकल उम्मेदवारी परेको छ ।

उपाध्यक्ष वाणिज्यतर्फ प्रमोद साह तेली र रामबाबु कलवारले उम्मेदवारी दिएका छन् । कलवार निवर्तमान  कोषाध्यक्ष हुन।

महासचिवमा प्रकाश गिरी र सुशिल शर्माले उम्मेदवारी दर्ता गराएका छन् । गिरी अघिल्लो कार्यसमितिमा पनि महासचिव थिए ।

कोषाध्यक्षमा विन्देश्वरी प्रसाद साह कलवार र रिना रौनियार पुरीको उम्मेदवारी परेको छ । कलवार अघिल्लो कार्यसमितिमा वाणिज्य सदस्य र पुरी उद्योग सदस्य थिईन् ।

सचिव उद्योगतर्फ मुकेशप्रसाद साहको मात्रै उम्मेदवारी परेको छ भने सचिव वाणिज्यतर्फको एक पदका लागि तीन जनाले उम्मेदवारी दर्ता गराएका छन् ।

 उक्त पदमा प्रदीप कुमार, रिता कंडेल र शान्ताकुमारी बजगाईं (रिना) ले उम्मेदवारी दिएका हुन् ।

वाणिज्यतर्फको सात सदस्यका लागि १० जनाले उम्मेदवारी दर्ता गराएको प्रमुख निर्वाचन अधिकृत अधिवक्ता सरदचन्द्र भट्टराई जानकारी दिए ।

 उनका अनुसार अमरेन्द्रकुमार साह कलवार, नवरतन प्रसाद कलवार, बलराम पौडेल, विभा गुप्ता, विजयकुमार गुप्ता, मनोहर बाबु गुप्ता, मुकुन्दराज रिजाल, रुपनारायण प्रसाद गुप्ता, शम्भुप्रसाद साह कलवार र श्रीराम साह कानुको वाणिज्य सदस्यमा उम्मेवारी परेको हो ।

सदस्य वस्तुगततर्फ सूर्यप्रसाद त्रिपाठीको एकल उम्मेदवारी परेको छ । यसैगरी सदस्य उद्योगतर्फको तीन पदका लागि तीन जनाले उम्मेदवारी दिएका छन् ।

 उम्मेदवारी दिनेमा ठहलबहादुर विश्वकर्मा, राकेशकुमार गुप्ता र राजेशकुमार प्रसाद साह रहेका छन् ।

सदस्य एशोसियटतर्फ हिमांशु गोल्छाले उम्मेदवारी दिएका छन् भने सदस्य आजिवनतर्फ कसैको पनि उम्मेदवारी नपरेको भट्टराईले बताए ।

निर्वाचन कार्यक्रमअनुसार  असार ४ गते बिहान १२ बजेसम्मका लागि उम्मेदवारी फिर्ता लिने समय दिएको छ ।

उम्मेदवारी फिर्ता नभए समितिले दिउँसो १ बजे उम्मेदवारको अन्तिम नामावली प्रकाशन गरी साँझ ५ बजे चुनाव चिन्ह समेत प्रदान गर्नेछ ।

चुनाव चिन्ह प्राप्त गरेपछि उम्मेदवारले असार ६ गते दिउँसो १ गतेसम्म प्रचारप्रसार गर्न पाउनेछन् भने त्यसपछि मौन अवधि सुरु हुने समितिले जनाएको छ । नेतृत्व चयनका लागि असार ७ गते बिहान ८ बजेदेखि अपरान्ह चार बजेसम्म मतदान हुनेछ । मतदानमा ९५८ मतदाता सहभागी हुनेछन् ।