स्थानीय सरकारहरु बजेट पेश गर्दै,शिक्षा, स्वास्थ्य, पर्यटन तथा भौतिक पूर्वाधार प्रथामिकताका क्षेत्र

इसीमाना सम्वाददाता २०८० असार १० गते ०९: ०९ मा प्रकाशित 381 पटक पढिएको

वीरगञ्ज । पर्साको जगरनाथपुर गाउँपालिकाले आगामी आर्थिक वर्ष २०८०/८१ को लागि ४१ करोड ८८ लाख रुपैयाँको बजेट पेश गरेको छ ।

आइतबार आयोजित गाउँपालिकाको ९ औँ गाउँसभामा गाउँपालिका अध्यक्ष श्रीकान्तप्रसाद यादवले अगामी आर्थिक वर्षकालागि ४१ करोड ८८ लाख रुपैयाँको बजेट पेश गरेका हुन।

अध्यक्ष यादवका अनुसार आगामी आर्थिक वर्षको नीति तथा कार्यक्रम र बजेटमा शिक्षा, स्वास्थ्य, धार्मिक स्थल तथा भौतिक पूर्वाधारको क्षेत्रलाई प्राथमिकतामा राखिएको छ ।

बजेटमा शिक्षा तर्फ २ करोड ३५ लाख २० हजार, स्वास्थ्य तर्फ १ करोड १३ लाख, कृषि तर्फ ८५ लाख ५५ हजार, मठमन्दिर तथा मस्जिद जस्ता धार्मिक सम्पदाका लागि १ करोड ४३ लाख रुपैयाँ विनियोजन गरिएको यादवले जानकारी दिए ।

यसैगरि पर्साको पटेर्वासुगौली गाँउपालिकाले आगामी आर्थिक वर्ष २०८०/८१ को लागि ३८ करोड १५ लाख ६ हजार ३ सय रुपैयाँको बजेट पेश गरेको छ ।

आइतवार सम्पन्न ११ औँ गाउँसभा उपाध्यक्ष ममता महतो थारुले बजेट पेश गरेकी हुन । पालिकाले कृषि, शिक्षा, स्वास्थ्य, पर्यटन र भौतिक पूर्वाधारको क्षेत्रलाई मुख्य प्राथमिकतामा राखेको पालिकाका अध्यक्ष दिनेश चौधरीले बताए ।

शनिवार पर्सागढी नगरपालिकाले आगामी आर्थिक वर्ष का लागि ५५ करोड ७० लाख बराबरको बजेट पेश गरेको छ ।

शनिबार सम्पन्न नगरपालिकाको नवौं नगरसभामा उपमेयर पूजा चौधरीले ५५ करोड ७० लाख ३८ हजारको बजेट प्रस्तुत गरेकी हुन् ।

नगरसभामा आगामी आर्थिक वर्षको नीति तथा कार्यक्रम प्रस्तुत गर्दै मेयर गोकर्ण पाठकले नीति तथा कार्यक्रममा पर्सागढी नगरपालिकाले कृषि, शिक्षा, पर्यटन तथा पूर्वाधार विकासलाई प्राथकिता दिएको बताए ।