काठमाडौ । नेपाल राष्ट्रिय बीमा अभिकर्ता संघले नेपाल बीमा प्रधिरकरण र बीमा कम्पनीहरुको मिलेमतोमा लाखौं बीमितलाई ठगि गर्ने गरेको खुलासा गरेको छ ।

 बिहिबार राजधानीको संवाद डबलीमा पत्रकार सम्मेलनको आयोजना गरी नेपाल लाईफ इन्स्योरेन्स कम्पनीले सबैभन्दा बढी ठगि गर्ने गरेकोे अरोपसमेत लगाएको छ ।

संघका अध्यक्ष राजेन्द्र अमात्यले बीमा कम्पनीहरुले लाखौं बीमितलाई ठगी गरिरहेको खुलासा गरेका छन् । बीमितलाई बिमाङ्क दोब्बर दिने भनेर निकै कम रकम भुक्तानी गर्ने गरेको तथा प्रति वर्ष प्रति हाजर ६५  रुपैयाँ  बोनस दिने भनेर ३७ मात्रै दिने गरेको अमात्यले जानकारी दिए ।

विगतमा सोको विरुद्धमा अभिकर्ताहरुले आवाज उठाई ८ वर्षसम्म रु ६५ बोनस कायम गर्न सफल भएको तर पछिल्ला ५ वर्षमा अभिकर्ताहरुकोबीचमा विभाजन ल्याई बोनसलाई रु ५० मा झारेको उनको  कथन छ ।

 कम्पनीहरुका वित्तीय प्रगतिका सुचाङक बढ्ने तर बीमितलाई दिइने बोनस बढ्नुको सट्टा घट्नुले बीमाप्रति जनसाधारणको धारणामा नकारात्मक बन्दै गएको उनले बताए ।

 “हामीले आजसम्म यो विषय बाहिर ल्याएका थिएनौं तर अब ल्याउन बाध्य भयौं  किनकी अग्रणी  ‘नेपाल लाईफ ईन्स्योरेन्स कम्पनि’ले धेरै बदमासी गर्न थाल्यो” अध्यक्ष अमात्यले भने  ।

अमात्यले लाखौं बीमितलाई झुट्टा आस्वासन दिएर बीमा गर्न लगाउने र अबधी समाप्त भएपछि विभिन्न बहानामा अत्याधिक रकम कटाएर दिने गरेको जानकारी दिए ।

अभिकर्ताहरुले कम्पनीको ‘पोलिसी’ अनुसार बीमितलाई बीमा गर्न लगाउने हुँदा मारमा अभिकर्ता पर्ने गरेको बताए । “जनताको रकमलाई दुरुपयोग गरी नाफा कमाउने कम्पनी अनि समस्या जति अभिकर्ताको थाप्लो हाल्ने, कहिलेसम्म सहने” अमात्यले प्रश्न गरे ।

 
आफूहरुले विभिन्न समयमा नियामक निकाय नेपाल बीमा प्राधिकरण र बीमा कम्पनीहरुलाई खबरदारी गर्दा पनि नसुनेको बरु ज्यादती बढाएको उनको आरोप छ ।

संघका महासचिव केशर बहादुर गरन्जाले नेपाल लाईफ इन्स्योरेन्सले भदौ ३ देखि ६ सम्म  काठमान्डौ स्थित होटल याक एन्ड यतिमा आयोजित ‘लिडरसिप एक्सिलेन्स अवार्ड’ कार्यक्रममा अभिकर्ताहरुले कम्पनीको बदनियतको विरोध गरेपछि ज्यादती बढाएको जानकारी दिए ।

त्यहाँ कार्यरत अभिकर्ताहरूलाई दुर्ब्यवहार  गरिएको तथा सांगठनिक अधिकार खोज्दा पक्राउ गरिएको आरोप गरन्जाको छ । “६ सय उपस्थित भएको कार्यक्रममा ३ सय जना बाउन्सर किन चाहियो, तीनको खर्चको स्रोत के हो, आधिकारीक संगठनमाथि पूर्वाग्रही बन्नु पर्ने कारण के” गरन्जाले प्रश्न गरे ।

वर्षभरि मेहनत गरी प्रथम बिमाशुल्क संकलनमा योगदान पुर्‍याएका अभिकर्ताहरूलाई सम्मानका लागि बोलाइएको कार्यक्रममा उल्टै उनीहरूमाथि दुर्ब्यवहार  गरेको भन्दै गरन्जाले रोष व्यक्त गरे ।

 “बाउन्सर लगाएर कुटपिट, लछारपछार, गल्हत्याउने मात्रै गरिएन राज्य शक्तिको दुरुपयोग गरी प्रहरीले संघको नेपाल लाईफ अध्यक्ष कृष्ण प्रसाद आचार्य र इमाडोल शाखा समिति अध्यक्ष शुभचन्द्र शाहलाई गिरफ्तार गरिनु घोर निन्दनीय कार्य हो” गरन्जाको कथन छ ।

उनले नेपालको संविधान, प्रचलित कानुन अनुसार श्रम विभागमा विधिवत् दर्ता भएको ट्रेड युनियनका नेतृत्वलाई अपमान गरिएको आरोप लगाए ।

कार्यक्रममा एउटा संघलाई काखि च्यापरेर अर्को संघलाई उपेक्षा गरी ऐन कानुनको समेत धज्जि उडाएको गरन्जाको धाराणा छ ।

अभिकर्ताहरूबीच विभाजन ल्याई बीमितको बोनस घटाउने तथा इन्स्योरेन्स कम्पनीभित्रका वेथिति विरुद्ध उठेका आवाजहरुलाई कमजोर पार्ने षड्न्त्र भएको गरन्जाको दाबी छ