गोल्छाको चीनीमिल संघाईको त्रिवेणी ग्रुपले किन्यो

इसीमाना सम्वाददाता २०८० सावन १२ गते १०: ३३ मा प्रकाशित 299 पटक पढिएको

बीरगंज । गोल्छा ग्रुप र विशाल ग्रुपले ऋण नतिरेपछि नेपाल बैंकले लिलामीमा निकालेको रौतहटको गरुडामा रहेको श्रीराम सुगर मिल्स लिमिटेड लिलाम भएको छ ।

श्रीराम सुगर मिल्स सांघाईहरु (रामचन्द्र सांघाई र विरेन्द्र सांघाई ) को त्रिवेणी ग्रुप अन्तर्गतको रिलायन्स सुगर एन्ड केमिकल्स इन्डस्ट्रिज लिमिटेडले किनेको हो । रिलायन्स सुगर एन्ड केमिकल्स इन्डस्ट्रिजमा त्रिवेणी ग्रुपसहित शिवशक्ति ग्रुपको लगानी छ ।

रिलायन्स सुगरले ४३ करोड ६० लाखमा श्रीराम सुगर मिल्स सकारेको हो ।

श्रीराम सुगर मिल्सले ऋण नतिरेपछि नेपाल बैंकले गत जेठ ३२ गते लिलामीको प्रक्रिया सुरु गरेको थियो । बैंकले साउन ४ गतेसम्म लिलाम बढाबढमा बोलपत्र पेश गर्न भनेको थियो ।

बैंकले न्यूनतम मूल्य ३८ करोड ११ हजार ७५५ रुपैयाँ तोकेर सूचना निकालेको भएपनि रिलायन्स सुगरले ४३ करोड ६० लाख कबोल गरेर सकारेको हो ।

श्रीराम सुगर मिल्समा नेपाल बैंकको नेतृत्वमा राष्ट्रिय वाणिज्य बैंक, हिमालयन बैंक र नेपाल इन्भेष्टमेन्ट मेगा बैंक र कर्मचारी सञ्चय कोषले १७ करोड रुपैयाँ ऋण लगानी गरेका थिए । ऋणको ब्याजसमेत जोड्दा साँवा र ब्याजसहित अहिले २६ करोड रुपैयाँ पुगेको छ ।

श्रीराम सुगर मिल्समा गोल्छा समूहले साझेदार भित्र्याउने क्रममा विशाल ग्रुपलाई प्रवेश गरायो । उद्योगले १ः३ को अनुपातमा ८९ करोड रुपैयाँ बराबरको हकप्रद सेयर निष्काशनको माग गरेको भएपनि धितोपत्र बोर्डले स्वीकृति दिएन ।

त्यसपछि २०४९ साल साउनमा गोल्छा समूहले स्थापना गरेको श्रीराम सुगर मिल्स २०७७ साउन देखि पूर्णरूपमा बन्द भएको थियो। रौतहट गरुडामा रहेको श्रीराम सुगर मिल्सको नाममा ८० बिगाहा जमिन छ ।