राजस्व संकलनमा गम्भिर असर, पेट्रोलको तस्करीको नयाँ तथ्य सार्वजनीक

इसीमाना सम्वाददाता २०८० असोज ४ गते ०७: ११ मा प्रकाशित 762 पटक पढिएको

वीरगञ्ज ।पेट्रोलियम पदार्थको तस्करीको डरलाग्दो रहस्य सार्वजनीक भएको छ । पेट्रोल ढुवानी गर्ने टंयाकरबाटै पेट्रोल ढुवानीको मुख्य बिन्दुबाटै तस्करी हुने गरेको तथ्य सार्वजनीक भएको हो ।

एउटा बिशेष सूचना पाएपछि पेट्रोल बोकेर आएका पाँचवटा ट्यांकरमा चेकजाँच गर्ने गर्ने प्रवन्ध मिलाएको सुरक्षा स्रोतले जनायो । अघिका दुइवटा र पछिका दुईवटामा घोषणा गरे अनुसारको पेट्रोल थियो तर वीचकोमा घोषणा भन्दा धेरै पेट्रोल भएको फेला पर्यो ।

भदौ ३१ गते बरौनीबाट पेट्रोल बोकरे आएको ना ४ ख ३१५६ नम्बरको ट्यांकरमा घोषणा गरिएभन्दा बढी एक हजार ७ सय लिटर बढी तेल भएको भेटिएको हो ।

ट्यांकर चालकले २० केएल अर्थात् २० हजार लिटर पेट्रोल भएको भनी घोषणा गरेर तौल गर्न लगाएका थिए। तर बाराको अमलेखगञ्जस्थित नेपाल आयल निगमको प्रादेशिक कार्यालयमा तौल गर्दा ट्यांकरमा एक हजार ७ सय लिटर बढी पेट्रोल लोड रहेको पाइएको सुरक्षा स्रोतले बतायो ।

भारतबाटै सिलबन्दी गरेर आउने ट्यांकरमा बढी इन्धन भएको भेटिएपछि ट्यांकर र चालकलाई नियन्त्रणमा लिइएको वीरगञ्ज भन्सार कार्यालयका सूचना अधिकारी रामचन्द्र शर्मा ढकालले जानकारी दिए ।

भारतको बरौनीबाट पेट्रोल सिलबन्दी गरेरै आउने गरेको छ । यस्तोमा पेट्रोल कसरी बढी भयो भन्ने कुरा अनुसन्धान हुदै गरिएको भंसारका अधिकारीले बताएका छन ।

पेट्रोलको तस्करीमा टंयाकरका मालिकको पनि संलग्नता बारेमा अनुसन्धान भइरहेको सुरक्षास्रोतले जानकारी दिएको छ । पेट्रोलको तस्करी राजस्व संकलन असर पार्ने घटना भएको सुरक्षा स्रोतको टिप्पणी छ ।