वीरगंज ३० वैशाख । विगत लामो समयदेखि वीरगंजका व्यवसायीहरुलाई ठग्दै हिडने गैर पत्रकार श्रीराम रायमाझी आज जिल्ला प्रहरी कार्यालय पर्साको फन्दामा परेका छन ।

गत वैशाख २७ गते नक्कली प्रहरी अधिकृत बनी वीरगंजको कुम्हाल टोलमा रहेको दुर्गा ट्रेडर्स नामक एक कपडा कारोबारीको गोदाममा पुगेर यहाँ भंसार छलेका सामानहरु छन भन्दै आफुले प्रहरीको भ्यान बोलाएर सबै सामान सहित पक्राउ गरिदिने धम्की दिंदै त्यहाँ कार्यरत रहेका कामदार भारत, ग्राम सहदेवा पंचायत नुनियाडिह वार्ड नं ३ निवासी धर्मेन्द्र कुमार साहलाई हातपात गर्दै उनीसँग रहेको नगद रु. ५० हजार रकम जबरजस्ती लिएर फरार भएका थिए ।

घटना पश्चात कामदारले आफना साहु वीरगंज लक्षमणवा वडा नं १८ निवासी पप्पु पटेललाई रूंदै जानकारी गराएका थिए । घटनाको जानकारी पाउनासाथ पप्पु पटेलले नक्कली प्रहरीको आवरणमा आएका गैर पत्रकार श्रीराम रामाझीलाई टेलिफोन सम्पर्क गरि तपाईले किन यस्तो कार्य गरेको, म तपाईलाई राम्रोसँग चिन्छु र लिएको पैसा फर्काउन आग्रह गर्दा उल्टै धम्की शैलीमा आफुसँग गएका प्रहरी लगायत हामी ५ जनाले उक्त ५० हजार बाँडी सकेकोले फर्काउन नसकिने र जहाँ मन लाग्छ त्यहाँ उजुरी गर्दा हुन्छ भनी जवाफ फर्काएका थिए ।

सो घटनाको बारेमा पिडितहरुले तत्कालै जिल्ला प्रशासन कार्यालय पर्सामा गई प्रमुख जिल्ला अधिकारी केशवराज घिमिरे समक्ष उजुरी सहित निवेदन दिएका थिए । जिल्ला प्रशासन कार्यालय पर्साबाट गैर पत्रकार श्रीराम रायमाझी लगायतका दोषीहरुलाई झिकाई आवश्यक कारवाहीको लागि जिल्ला प्रहरी कार्यालय पर्सामा पत्रचार आएकोले आज जिल्ला प्रहरी कार्यालय पर्साले पीडित पक्षले दिएको कारवाहीको निवेदन उपर गैर पत्रकार श्रीराम रायमाझीलाई जिल्ला प्रहरी कार्यालयमा झिकाई दुवै पक्ष बसाएर छलफल गरि जबरजस्ती लुटेको रु. ५० हजार फर्काउने शर्तमा र अब उप्रान्त यस्ता घटना नदोहोर्याउने लिखित प्रतिबद्धता पछि पत्रकारको नाममा ठगी गर्ने रायमाझी घर फर्कन पाएका हुन ।

रायमाझीले आफुले मात्र होइन अन्य ५ जनाले पनि लिएको रकम बाँडेको समेत सो अवसरमा बताएपनि क–कसले रकम लिएको भन्ने कुरा भने लुकाएका थिए । गैर पत्रकार रायमाझीलाई जिल्ला प्रहरी कार्यालयमा कागज गरि छाडिएको हो । यताका केहि दिनहरुमा पत्रकारको नाममा विभिन्न औद्योगीक प्रतिष्ठान तथा व्यापारीक फर्ममा छापामारी रकम असूल गर्ने, नक्कली प्रहरी अधिकृत बनी आतंक फैलाउने काममा रायमाझीको नेतृत्वमा छापामार टोली नै परिचालित भएको थियो ।

आजको घटनाले भने यसतर्फ सबै जिम्मेवार निकायहरुलाई ध्यानाकर्षण हुने अपेक्षा गरिएको छ । स्मरण रहोस व्यवसायीहरुबाट अनाधिकृत रुपमा रकम संकलन गरेको, नेपाल पत्रकार महासंघ पर्सा शाखाका पुर्व सभापतिको नाम दुरुपयोग गरि चन्दा आतंक गरेको, पर्सेलि पत्रकारहरुको मर्यादा र प्रतिष्ठामा आंच आउने गतिविधिहरु नरोकेकाले नेपाल पत्रकार महासंघ पर्सा शाखाले सदस्यता शुद्धीकरण अभियान अन्तर्गत गैर पत्रकारका रुपमा चिनिएका श्रीराम रायमाझीको यस अघि नै सदस्यता खारेज गरि सकेको छ ।