बीरगंज १९ साउन  ।
    जनता आवास कार्यक्रम अन्तर्गत पर्सा जिल्लाको जीराभवानी र पटेर्वा सुगौली गाउँपालिकाको वडा नं  ५ निचुटाका दलित परिवारहरू अहिले समस्यामा परेका छन । 

    आव २०७३÷०७४ देखि लागू यो कार्यक्रम अन्तर्गत दलितहरूले आफनो पुरानो घर भत्काएर नयाँ अर्धपक्की घर निर्माणमा जुटेका थिए  । तर दुई वर्षायाम बितिसक्दा पनि अर्धपक्की घर तयार भएको छैन । यो वर्ष पनि त्रिपालको साहरामा उनीहरुको वर्षायाम कटदैछ ।

सामान्य खालको घर बनाउन दुई वर्षको समय लाग्ने कुरालाई कुनै पनि आधारमा ठिक हो भन्न सकिने आधार छैन स्थानीय राधेश्याम महतोले भने   यस्तै पाराले गर्दा नै सरकारी काम प्रति जनताको बिश्वास पनि रहदैन ।

 जिराभवानीको मात्र हैन पटेर्वा सुगौलीको वडा नं ५ निचुटाका २८ घरधुरी पनि छानाको माग गर्दै सदरमुका बीरगंज स्थित शहरी विकास तथा भवन डिभिजन कार्यालय  धाउदै छन । 

निचुटाका छन्नु हजरा दुसाधले त छाना हाल्न बाँकी रहदै आफनो घरको पर्खाल क्रेक भएको बताए  । उनले निर्माण समेत गुणस्तरहिन भएकोमा गुनासो समेत गरेका छन । एक त गरिब त्यसमाथि हेरिदिने बुझिदिने कोही छैन उनले भने “पुरानै घर ठिक थियो ओत त लागेकै थियौ नी ”। 

घर निर्माणमा प्रयोग गरिएको इट्टा समेत कमसल खालको भएको जुगल पासवानले बताए  । उनले आठवटा घरमा प्रयोग गरिएको इट्टा बोकेर ल्याएको समेत बताउ  । गुणस्तरहिन निर्माण त्यो पनि वर्षाको बेला कष्टपूर्ण अवस्थामा सुनिदिने कोही छैन भन्दै उनीहरुले आक्रोश ब्यक्त गरे । 

निर्माणको जिम्मा लिने उपभोक्ता समितिका अध्यक्ष र कोषाध्यक्षले यही अवधीमा जमिन किनेर पक्का ढलान घर बनाएको देखेका उनीहरुले अध्यक्ष भिखारी हजरा दुसाध र कोषाध्यक्ष लालबाबु राम जिम्मेवार नभएको बताउन भने छाडेनन ।  

उनीहरुले आफूहरुको घर बनाउने पैसा चलाएर आफनो घर बनाएको र खोजीदिने कोही नभएको आरोप समेत लगाए ।

 जीराभवानी गापा–१ निवासी शत्रुघ्न राम चमारले बिहान–बेलुकी छाक टार्ने समस्या त छँदैथियो, अहिले ओत लाग्ने समस्या पनि भोग्नुपरेको बताए  । एक वर्षभित्र निर्माण हुनुपर्ने अर्धपक्की घर दुई वर्ष बितिसक्दा पनि निर्माण नहुँदा बिचल्लीमा परेको उनको  भनाई छ । 

    घरनिर्माणको काम पूरा भएको छ तर छाना नहाल्दा प्लास्टिकको त्रिपाल राखेर बस्नुपर्ने अवस्था उनीहरूको छ । जीराभवानी गापा–१ मा ५३ र वडा नं . ४ मा ६४ गरी ११७ घर निर्माण हुँदैछन् । यो वर्षामा पनि सबैको समस्या समान छ । घरनिर्माणको लागि चार किस्तामा रु २ लाख १४ हजार पाउनुपर्ने हो तर चौथो किस्ताको अभावमा घरनिर्माण कार्य पूरा भएको छैन ।

शहरी विकास तथा भवन डिभिजन कार्यालयका प्रमुख सदरे आलमले तेस्रो किस्ताको रकम निकासा सकिएको र चौथो किस्ताको रकम रु २२ हजार ५ सय छाना र शौचालय निर्माणपछि पठाउने बताए  । 

    समयमा किस्ताको रकम नपाएपछि घरनिर्माणमा ढिलाइ भएको उनीहरुको भनाई छ । पर्सा जिल्लामा जनता आवास कार्यक्रम अन्तर्गत आव २०७३/७४ मा एक हजार घर निर्माणको थालनी भएको थियो ।