वीरगन्ज, १५ पुस । त्रिभुवन विश्व विद्यालयको आंगिक क्याम्पसको रुपमा रहेको वीरगन्जको दुईवटा क्याम्पस यतिखेर निकै चर्चामा आएको छ । आंगिक क्याम्पसहरु ठाकुरराम बहुमुखी क्याम्पस र वीरगन्ज नर्सिङ्ग क्याम्पसमा आफन्तलाई भर्ना गर्न होडवाजी चलेको छ ।

आवश्यकता नै नभएको पदमा आन्तरिक श्रोतबाट करारमा नियुक्ति गर्ने भन्दै ठाकुरराम बहुमुखी क्याम्पस र नर्सिङ्ग क्याम्पसले विज्ञापन प्रकाशन गरेर आफन्तलाई भर्ना गर्ने प्रपन्च गरेका छन् । केही महिना अघि ठाकुरराम क्याम्पसमा विभागीय प्राध्यापकहरुको असहमतिमा पनि आफन्तलाई जागिर लगाउनकै लागि भर्नाको लागि विज्ञापन गरेर नियुक्ति दिएको थियो ।

अहिले वीरगन्जको अर्को वीरगन्ज नर्सिङ्ग क्याम्पसले फेरी कर्मचारी भर्नाको विज्ञापन गरेर आफन्तलाई जागिर लगाउने गरि भर्ना खुलाएको स्रोतले दावी गरेको छ । नर्सिङ्ग क्याम्पसले आफन्तलाई भर्ना गर्नका लागि नियम विपरित विज्ञापन गरिएको छ । वीरगन्ज नर्सिङ्ग क्याम्पसमा दरबन्दी अनुसारको कर्मचारीहरु नभएपनि त्रिभुवन विश्व विद्यालयले नै भर्नाको लागि विज्ञापन आह्वान गरेर कर्मचारी लिनुपर्ने भएपनि आन्तरिक श्रोतको नाममा नर्सिङ्ग क्याम्पसले आफन्तलाई भर्ना गर्नका लागि एकजना कार्यालय सहायक र लेखा सहायकको विज्ञापन गरिएको छ ।

नर्सिङ्ग क्याम्पसमा दरबन्दीका लागि त्रिभुवन विश्व विद्यालयले विज्ञापन खुला गरेको भएपनि क्याम्पस प्रमुख र प्रशासन प्रमुखको मिलेमतोमा नियम विपरित कर्मचारी भर्नाको लागि सूचना निकालेको छ । दुवैजनाको मिलेमतोमा मिति २०७६÷९÷८ गते नै विज्ञापनको सूचना प्रकाशित गर्नुपर्नेमा उक्त दिन प्रकाशन नगरेर कर्मचारीहरुको दबावमा पुस १५ गतेमात्रै प्रकाशित गरेको छ ।

तोकिएको मितिमा प्रकाशित गर्नुपर्ने विज्ञापन मिति नघाएर प्रकाशित गरेपनि निजामति वा त्रिभुवन विश्वविद्यालय सेवा आयोगका अनुसार सहायक द्वितीय श्रेणीको (खरिदार) पदमा एसएलसी वा सो सरहको न्यूनतम शैक्षिक योग्यता हुनुपर्ने व्यवस्था रहेको छ । तर, नर्सिङ्ग कलेजले प्रकाशित गरेको सूचनामा प्रविणता प्रमाणपत्र तहको न्यूनतम शैक्षिक योग्यता खुलाएको छ ।

यो नियम र कार्यविधि भन्दा बाहिर रहेर आफन्तको लागि अनुकूल मिलाएर विज्ञापन गरिएको श्रोतले जनाएको छ । वीरगन्ज नर्सिङ्ग कलेजकी प्रमुख सूर्य कोईरालाले भने नियमानुसार खुला प्रतिस्पर्धाबाट भर्ना गर्नका लागि विज्ञापन गरिएको बताईन् ।

उनले क्याम्पसमा दरबन्दी अनुसारको कर्मचारीहरु नभएको र तत्काल कर्मचारीको आवश्यकता भएकोले त्रिभुवन विश्व विद्यालयसँग अनुमति लिएर नै भर्नाका लागि विज्ञापन गरिएको दावी गरिन् । उनले त्रिभुवन विश्वविद्यालय सेवा आयोगले कर्मचारी पठाएमा करारमा भर्ना गरिएको कर्मचारी स्वतः बर्खास्त हुने बताईन् ।