बीरगंज १६ फाल्गुण ।बीरगंज महानगरका प्रमुख बिजय कुमार सरावगीले  व्यवसायिक पत्रकारिताका लागि व्यवसायिक र दक्ष फोटो पत्रकार आवश्यक पर्ने बताउनु भएको छ । नेपाल पत्रकार महासंघ, प्रदेश नम्वर २ र नेपाल फोटो पत्रकार महासंघ, प्रदेश नम्वर २ को आयोजना गरेको फोटो पत्रकारिता तालिम तथा फोटो प्रदर्शनीको आज बीरगंज उधोग वाण्ज्यिसंघमा उद्धघाटन गर्दै यस्तो बताउनु भएको हो । 

उहाँले बीरगंजमा पत्रकरिताको गुणत्मक बिकासमा आफू सदैव सकारात्मक रहेको बताउनु भयो । पत्रकारिता क्षेत्रको विकासका लागि वीरगञ्ज महानगरपालिका सधैँ तयार रहेको पनि उहाँले बताउनुभयो ।

उहाँले पत्रकारिता समाजको विम्वको रुपमा बन्न सक्नु पर्छ । पत्रकारिताका कारण कतिपय अवस्थामा निकै चित्त दुखेका अवस्थाहरु पनि आएको चर्चा गर्दै नखाएको बिष पनि लाग्ने जस्तो बनाउन नहुनेमा पत्रकारहरुलाई सचेत हुन समेत आग्रह गर्नु भयो । उहाँले प्रदेश २ मा सयभन्दा बढी महत्त्वपूर्ण पर्यटकीय स्थल रहेकाले तिनलाई फोटो पत्रकारिताको माध्यमबाट उजागर गर्नुपर्नेमा जोड दिनुभयो । उहाँले पर्सामा रहेका ऐतिहासिक स्थानको प्रवद्र्धनमा पत्रकारिताको योगदान खोजी भएको बताउनु भयो ।

तालिम तथा फोटो प्रदर्शनी उद्घाटन कार्यक्रममा नेपाल फोटो पत्रकार महासंघका अध्यक्ष धु्रव आले, उद्योग वाणिज्य संघ, प्रदेश नम्वर २ का उपाध्यक्ष एवम् वीरगञ्ज उद्योग वाणिज्य संघका पूर्वअध्यक्ष अशोक बैद्य, फोटो पत्रकार महासंघका महासचिव हरि रेग्मी, नेपाल पत्रकार महासंघका केन्द्रीय सदस्य कृष्ण गिरी, प्रदेश २ का उपाध्यक्ष केसी लामिछाने, पर्साका अध्यक्ष श्याम बञ्जारा, वीरगञ्ज उद्योग वाणिज्य संघका महासचिव माधवराज पाल, भिजिट नेपाल पर्साका सदस्य मोहन प्रधान, फोटो पत्रकार महासंघ प्रदेश २ का अध्यक्ष राम सर्राफ र पर्सा अध्यक्ष विजय चौहानले आफ्ना भनाई राख्नुभएको थियो । उद्घाटन कार्यक्रम नेपाल पत्रकार महासंघ, प्रदेश नम्वर २ का अध्यक्ष दिपेन्द्र चौहानको अध्यक्षतामा भएको थियो ।

शुक्रबारदेखि वीरगञ्जमा शुरु भएको  आधारभूत फोटो पत्रकारिता तालिम तथा प्रदेश नम्वर २ स्तरीय फोटो प्रदर्शनी   तीन दिनसम्म सञ्चालन हुनेछ । तालिममा प्रदेश २ का ३० जना पत्रकारको सहभागिता रहेको नेपाल पत्रकार महासंघ प्रदेश २ का सचिव गुरु गौतमले बताउनु भयो ।

प्रतियोगितात्मक फोटो प्रदर्शनीमा प्रदेश २ को संस्कृति र पर्यटनसँग सम्बन्धित ५० वटा फोटो प्रदर्शनीमा राखिएको छ । मूल्याङ्कनमा पहिलो, दोस्रो र तेस्रो हुने फोटोलाई क्रमशः ३० हजार, २० हजार र १० हजार रुपैयाँ पुरस्कार दिइने छ ।

फोटो पत्रकारिता तालिम नेपाल पत्रकार महासंघ, पर्साको हलमा सञ्चालन गरिएको छ । तालिमको प्रशिक्षकमा वरिष्ठ फोटो पत्रकार नरेश श्रेष्ठ, किरण पन्थ, बालकृष्ण थापा, विजय सिंहलगायत रहनुभएको छ ।

फोटो प्रदर्शनी वीरगञ्ज उद्योग वाणिज्य संघको हलमा गरिएको छ । फोटो प्रदर्शनी पनि आइतबारसम्म चल्ने छ । तालिम तथा प्रर्दशनीको स्थानीय ब्यवस्थापन भने  नेपाल पत्रकार महासंघ, पर्सा र नेपाल फोटो पत्रकार महासंघ, पर्साले गरेका छन ।  तालिममा नेपाल पत्रकार महासंघ, केन्द्रीय तालिम विभागको सहयोग रहेको छ ।