वीरगंज । वीरगंज महानगरपालिकाको आर्थिक सहयोगमा श्री राधेमाई सामुदायिक विकास संस्थाको आयोजनामा पत्रकार महिलाकोलागि तीन दिने क्षमता अभिवृद्धि तालिम बुधबारदेखि वीरगंजमा सुरु भएको छ ।
क्षमता अभिवृद्धि तालिमको नेपाल पत्रकार महासंघका केन्द्रीय लेखा समिति संयोजक के.सी. लामिछानेले कार्यक्रमको उद्घाटन गरेका थिए ।
संयोजक लामिछानेले पत्रकारिता समाजको ऐनाको रुपमा रहेको चर्चा गर्दै सीप अभिबृद्धिका माध्यमले पत्रकारिताको गुणात्मक परिर्वतन आउने बिश्वास ब्यक्त गरे ।
उनले पत्रकारिता जिम्मेवार र जवाफदेहीपूर्ण पेशा भएकोले पत्रकारहरु पनि आफ्नो उत्पादन प्रति जिम्मेवार हुनु पर्ने बताए । उनले प्रविधिको बिकासको पछिल्लो कालखण्डमा पत्रकारहरुको सीप बिकास बिकल्पहीन भएको बताए ।
उद्घाटन कार्यक्रममा नेपाल पत्रकार महासंघ पर्साका उपाध्यक्ष निलिमा पौडेल, पूर्व उपाध्यक्ष युवराज खड्का लगायत वक्ताहरूले महिला सञ्चारकर्मीहरूको भूमिका, चुनौती र सशक्तिकरणका विषयमा आफ्ना धारणा व्यक्त गरे।
कार्यक्रम संस्थाकी कार्यक्रम संयोजक पूजा देवीको अध्यक्षतामा सम्पन्न भएको थियो भने तालिमको सहजीकरण पत्रकार आनन्द पटेलले गरेका थिए।
बसपार्कस्थित होटल हिमालमा शुरु तालिममा २५ जना महिला पत्रकारहरूको सक्रिय सहभागिता रहेको आयोजक संस्थाले जनाएको छ।
तपाईको प्रतिक्रिया