वीरगन्ज । पर्साको पर्सागढी नगरपालिकामा २११ औँ पर्सागढी विजय उत्सवलाई ऐतिहासिक र भव्य रूपमा मनाउन व्यापक तयारी सुरु गरिएको छ।

मंगलबार नगरप्रमुख गोकर्ण पाठकको अध्यक्षतामा सम्पन्न विशेष अन्तरक्रिया तथा छलफल कार्यक्रमले उत्सव व्यवस्थापनका लागि महत्वपूर्ण निर्णयहरू गरेको पर्सागढी नगरपालिकाका प्रमुख प्रशासकीय अधिकृत राजु प्रसाद साहले जानकारी दिए।

बैठकले आगामी २०८२ पुस १९ गते बिहान १० बजेदेखि नगरभित्रका विद्यार्थी, कर्मचारी, शिक्षक, सामाजिक अगुवा तथा आम सर्वसाधारणको उपस्थितिमा सांस्कृतिक झाँकीसहित भव्य विजय उत्सव मनाउने निर्णय गरेको छ।

ऐतिहासिक वीरताको प्रतीकका रूपमा रहेको यस दिवसलाई उत्सवमय बनाउन नगरपालिकाले सबै क्षेत्रका नागरिकहरूलाई गरिमामय उपस्थितिका लागि हार्दिक निमन्त्रणा गरेको छ।

यो उत्सवले पर्सागढीको ऐतिहासिक पहिचानलाई उजागर गर्दै स्थानीय एकता र गौरवलाई थप मजबुत बनाउने विश्वास नगरप्रमुख गोकर्ण पाठकले व्यक्त गरे।

पर्सागढी तत्कालीन इष्ट इण्डिया कम्पनीलाई गोर्खाली सेनाले पराजित गरेको ऐतिहासिक विजयगढी हो। नेपालका गढीहरूमध्ये गोर्खाली सेनाले विजय हासिल गरेको महत्वपूर्ण स्थल हुँदाहुँदै पनि राज्यको पर्याप्त ध्यान नपुगेका कारण पर्सागढी लामो समयसम्म जीर्ण अवस्थामा रहँदै आएको थियो।

स्थानीय सरकार गठनपछि यसको ऐतिहासिक महत्व उजागर गर्न संरक्षण, विकास तथा प्रचार–प्रसारमा जोड दिइएको छ। पछिल्ला वर्षहरूमा नेपाली सेनाले समेत यसको संरक्षणप्रति चासो बढाएको छ। त्यसयता प्रत्येक वर्ष पर्सागढीमा विजय उत्सव मनाउँदै आइएको छ।

मंगलबार सम्पन्न छलफल तथा बैठकमा नेपाली सेनाको श्रीपुरस्थित श्री जंग गणका गणपति लोकेन्द्र कार्की, पर्सागढी नगरपालिकाकी उपप्रमुख पूजा चौधरी, प्रमुख प्रशासकीय अधिकृत राजु प्रसाद साहसहित नगरपालिका कर्मचारीहरू, विभिन्न राजनीतिक दलका प्रतिनिधि, मन्दिर व्यवस्थापन समितिका अध्यक्ष वृजमोहन चौधरी, विद्यालयका शिक्षक, समाजसेवी तथा बौद्धिक व्यक्तित्वहरूको सक्रिय सहभागिता रहेको थियो।

के भएको थियो पर्सागढीमा

वि.स. १८७१ पुस १८ र १९ गते नेपाल र भारतलाई औपनिवेश बनाएर शासन गर्दै आएको ब्रिटिश इष्ट इन्डिया कम्पनी फौजसँग पर्सागढीमा युद्ध भएको थियो ।

महेशराज पन्तले लेखेको नेपाल अंग्रेज युद्धको दोस्रो चरण २०२२ पुस्तकको पुष्ठ ७१ मा यसबारेमा उल्लेख छ । नेपालतर्फको नेतृत्व रञ्जित चौधरीले गरेको र अंग्रेजतर्फको नेतृत्व मेजर जनरल मार्ले/कप्तान सिब्लीले गरेक थिए । अंग्रेजहरुको फौज ५ सयको संख्यामा रहेको अनुमान छ ।

पूर्वमा सिंग्याही खोला र पश्चिम तिलापे खोलाको बीचमा गढी इलाका रहेको प्रमाणहरु भेटिएको छ । विभिन्न हातहतियारबाट सुसञ्जित अंग्रेज फौजलाई दुवै नदी थुनेर ठूलो संख्यामा भैंसी, राँगा र गोरुहरुको सिंगमा मसाल बाँधेर छोडेर गोर्खाली फौज ठूलो संख्यामा रहेको भान पारी अत्याएर उनीहरुलाई पराजित गरेके किंवदन्ती छ ।