वीरगंज । के.एस. मल्टिपर्पोज प्रा.लि . र त्यसका संचालक कमल कुमार उपाध्यायका कारण फेरी तीन जना निलम्वित हुन पुगेका छन ।

प्रा.ली.ले पर्साको छिपहरमाई गाउँपालिकामा बोलपत्र आह्वानसम्बन्धी झुट्टा सूचना प्रकाशित गरिएको देखाई सरकारी रकम  दुरुपयोग गरिएको निष्कर्ष निकाल्दै  अखितयारले बिशेष अदालतमा मुद्धा दायर गरेपछि तीन जना निलम्बनमा परेका हुन । 

अख्तियार दुरुपयोग अनुसन्धान आयोगले पर्साको छिपहरमाई गाउँपालिका अध्यक्ष, कर्मचारी तथा प्रा.लि विरुद्ध बुधवार विशेष अदालत काठमाडौंमा मुद्दा दायर गरेको छ।

अख्तियारका अनुसार आर्थिक वर्ष २०७९र८० मा छिपहरमाई गाउँपालिकाले विभिन्न विकास निर्माण कार्यका लागि ठेक्का आह्वान गर्दा राष्ट्रियस्तरको सौर्य दैनिक पत्रिकामा सूचना प्रकाशित गरिएको भनी भुक्तानी दिइएको थियो।

तर अनुसन्धानका क्रममा सो मितिमा उक्त पत्रिकामा कुनै पनि सूचना प्रकाशित नभएको प्रमाणित भएको हो। सूचना प्रकाशीत नभई के.एस. मल्टिपर्पोज प्रा.लिका अध्यक्ष कमल कुमार उपाध्यायले आफ्नो कम्पनीको नाममा बिल काटेर भूक्तानी लिएका कारण आज यो अवस्था आएको हो । 

आयोगको अनुसन्धानबाट गाउँपालिका अध्यक्ष मनोज कुमार, तत्कालीन प्रमुख प्रशासकीय अधिकृत सिकिन्द्रप्रसाद साह, तत्कालीन लेखापाल संजय पटेल तथा विज्ञापन एजेन्सी केएस मल्टिपर्पोज प्रालि वीरगञ्जका सञ्चालक कमलकुमार उपाध्यायको मिलेमतोमा योजनाबद्ध रूपमा झुट्टा सूचना देखाएर रकम भुक्तानी गरिएको खुलेको अख्तियारका प्रवक्ता एवम् सहसचिव सुरेश न्यौपानेले जानकारी दिए ।

अख्तियारका अनुसार खानेपानीका लागि ट्युबवेल जडान, छिपहरमाई स्टेडियम निर्माण, चार कोठे भवन तथा दलित आवास भवन निर्माणसम्बन्धी ठेक्कामा बोलपत्र आह्वानको सूचना सौर्य दैनिकमा प्रकाशित भएको देखाउँदै विज्ञापन एजेन्सीलाई रकम भुक्तानी गरिएको थियो। तर प्रेस काउन्सिल नेपालबाट प्रमाणित हार्डकपी र पीडीएफ अभिलेखमा ती सूचना प्रकाशित भएको नदेखिएको पुष्टि भएको छ।

आयोगले बदनियतपूर्वक सूचना लुकाई केएस मल्टिपर्पोज प्रालिलाई दुई पटकमा कुल ४ लाख २९ हजार ४ सय रुपैयाँ भुक्तानी गरिएको ठहर गरेको छ। यसबाट गैरकानुनी लाभ लिइएको र सरकारी सम्पत्तिमा हानि पुगेको निष्कर्ष निकालिएको आयोगले जनाएको छ।

 विज्ञापन एजेन्सी केएस मल्टिपर्पोज प्रा.लि. र सञ्चालक कमलकुमार उपाध्यायलाई मुख्य कसूरदारका मतियारका रूपमा अभियोग लगाइएको छ।

प्रतिवादी बनाइएका उपाध्याय  यसअघि पनि  बाराको पचरौता नगरपालिकामा ठेक्का सूचना प्रकाशनको नाममा रकम हिनामिना गरेको अभियोगमा दोषी ठहर भइसकेका व्यक्ति हुन्।

 विशेष अदालतले उनलाई ६ महिना कैद र १ लाख १७ हजार ५ सय २० रुपैयाँ जरिवाना तिराउने फैसला गरेको छ।

उपाध्याय नेपाल पत्रकार महासंघ बाराका पूर्वअध्यक्ष तथा प्रेस चौतारी नेपालका पूर्वसचिव समेत रहिसकेका छन् भने बाराबाट प्रकाशन हुने कृपा दैनिकका प्रकाशक तथा सम्पादक पनि हुन्।