शहिद दिवसको अवसरमा बाल कल्याण गृहमा सामग्री वितरण

1/29/2017 गते 00 00 मा प्रकाशित 1512 पटक पढिएको

वीरगंज १६ माघ

राजनैतिक दलहरुको सत्ताको लुछाचुडीका कारण शहिदहरुको अपमान भएको भन्दै वक्ताहरुले गुनासो गरेका छन् । स्वतन्त्र मानव अधिकार समाज केन्द्रीय कार्यालय बीरगंजले शहिद दिवसको अवसरमा आज वीरगंज स्थित बाल कल्याण गृहमा आयोजित अन्तरक्रिया तथा अनाथ बालबालिकालाई फलफुल तथा कपी, कलम वितरण समारोहलाई सम्बोधन गर्दै वक्ताहरुले शहिदको सूचीमा चोर देखि अपहरणकारी सम्म समावेश हुनु दुःखद विषय भएको कुरामा जोड दिएका थिए ।

कार्यक्रमलाई सम्बोधन गर्दै संघिय समाजवादी पार्टीका केन्द्रिय उपाध्यक्ष राजकुमार यादवले जनताको अधिकारको लागि बलिदानी दिएका शहिदहरुको सपना विपरित देश अगाडी बढी रहेको बताए । उनले नीति प्रधान हुनु पर्नेमा नेता प्रधान भएको कारण देश कमजोर बन्दै गएको बताए । उनले आम नागरिक समाज, जनता सचेत भई भ्रष्ट र सत्तामुखी नेतालाई तह लगाउनु पर्ने कुरामा जोड दिए । कार्यक्रममा सदभावना पार्टीका सहमहामन्त्री सुरेन्द्र कुर्मीले शहिदले देखेको सपना विपरित देश अगाडी बढी रहेको र सात सालको प्रजातान्त्रिक आन्दोलन देखि अहिले सम्म मुलुक आई पुग्दा सहिदको व्याख्या नै गलत तरिकाले भई रहेकोमा आपत्ति प्रकट गरे ।

स्वतन्त्र मानव अधिकार समाजका अध्यक्ष कृष्ण कुमार खनालको सभापतित्वमा सम्पन्न कार्यक्रममा इन्सेक प्रतिनिधि के.सी लामिछाने, सदभावना पार्टीका नेजामोद्दिन समानी, नेपाल पत्रकार महासंघका सहसचिव शेखर छतकुली, विद्यार्थी नेता दिलिप कार्की, सामाजिक अभियान्ता प्रकाश थारु, हिन्दु परिषद नेपालका केन्द्रिय अध्यक्ष पुरुषोत्तम दुवे लगायतको सहभागिता रहेको थियो ।