पहिचानवादीहरुको एकिकृत आन्दोलन आजको आवश्यकताः नेता महतो

इसीमाना सम्वाददाता २०८० फागुन २६ गते ०८: ०४ मा प्रकाशित 317 पटक पढिएको

जनकपुरधाम । लोकतान्त्रिक समाजवादी पार्टी परित्याग गरेर ‘राष्ट्रिय मुक्ति क्रान्ति’को अभियान थालेका राजेन्द्र महतोले पहिचानवादीहरुको एकिकृत आन्दोलनको आवश्यकतामा जोड दिएका छन ।

अभियानले शनिवार जनकपुरमा आयोजना गरेको वृहत संवादात्मक कार्यक्रमलाई सम्बोधन गर्दै उनले यस्तो बताएका हुन । उनले अधिकार तथा पहिचानवादीहरुको अलग अलग आन्दोलनका कारण सफलता पाउन नसकिएको चर्चा गर्दै सबैको सहभागितामा राष्ट्रिय आन्दोलन सृजन गर्नु पर्ने बताए ।

उनले भने मधेस, थरुहट जनजाति अन्दोलनको संयुक्त रुप भनेको राष्ट्रिय मुक्ति क्रान्ति हो र यसले देशमा बहुलराष्ट्रिय राज्य स्थापना गर्छ ।

नयाँ सरकारको टिप्पणी गर्दै नेता महतोले नयाँ गठबन्धन सरकारले जनताको इच्छा आकांक्षा पूरा नगर्ने उल्लेख गर्दै उनले नयाँ बनेको सत्ता समीकरणको सरकार कुर्सीको हेराफेरी र भाग मिलाउनका लागि मात्रै भएको टिप्पणी गरे ।

उनले भने, ‘यो पालैपालो लुटतन्त्र मच्चाउनले कुर्सीको खेल मात्रै हो । यो वा पहिलो जुनसुकै गठबन्धन सरकार आएपनि जनताले केही पाउने होइनन् । उनीहरुबाट विकास हुने होइन । लुटतन्त्र र भ्रष्टाचार चल्ने मात्रै हो । त्यसकारण यो सत्ता समीकरणबाट बनेको सरकारबाट जनताले केही पाउँदैनन् ।’

मधेसवादी दलहरुमा एकताबद्ध हुन नसकेको र महतो आफैँ कही टिक्न नसकेको सञ्चारकर्मीको जिज्ञासामा महतोले स्वार्थको लागि मधेसवादी दलहरू फुट्ने र जुट्ने प्रक्रिया चलिरहने बताए ।